Umdlali womdlalo wenqindi uMeluleki Ngulube wayekhangelelwe ukuba uzakwenza izimanga ngesikhathi esakhula kodwa ucine etshiya umdlalo wenqindi ngoba engatholi imidlalo.
UNgulube uqale ukudlala umdlalo wenqindi ngo2003 eleminyaka elitshumi eyokuzalwa lapho abekhona lilunga leqembu ebelizilolongela eTshaka Youth Centre elokitshini laseMakokoba.
Ngalowo mnyaka uhle waphatheka kumncintiswano weZimbabwe National Youth Games oqhutshelwe edolobheni lakoBulawayo lapho athole khona imendulo yombala wesiliva.
Uthe esethe hluthu ubeyingxenye yeqembu ebelimele idolobho lakoBulawayo kumncintiswano ofanayo oqhutshelwe edolobheni laseMarondera.
“2009 eMarondera kumncintiswano weNational Youth Games yikho lapho abantu abaqala khona ukubona ukuba ngilesiphiwo emdlalweni wenqindi. Ngokudlala kwami ngabuya lemendulo yombala wegolide. Sahamba kumncintiswano weChampion of Champions ekupheleni kwalowo mnyaka ngafika ngaba yintshantshu kusigaba se pin weight, okuyisigaba sabantu abalula ngoba isisindo sami besiyi 45kg. Kuthe ngo2010 ngayaphatheka kumaNational Youth Games eHarare lakho ngayabuya ngiphethe imendulo yombala wegolide,” kutsho uNgulube.
Ngemva kwalokho umqeqetshi kaNgulube umuyi uPhilip Striker ukhethe ukuba uNgulube etshiye ukulwa eli amateur abe liprofessional njalo uthi lokho kwamlethela ubunzima obukhulu.
“Ngo2010 umqeqetshi uStriker wakubona kufanele ukuba sekumele sibe ngama professional njalo lathi sasikubona ukuba sekumele kube njalo. Ngakwenza lokho lomngane wami uNtando Sibanda njalo sadlala umdlalo owodwa kwathi ngemva kwalokho ngahlala isikhathi eside kabi ngingatholi imidlalo. Umdlalo wami wesibili ngize ngawuthola ngo2018 njalo angizange ngenze kuhle ngoba sengihlale isikhathi eside ngingadlali. Ngalowo mnyaka yikho lapho engalahlekelwa khona lithemba emdlalweni wenqindi,” kutsho uNgulube.
Ukungadlali kutsho ukuba uNgulube ubengaselayo indlela yokuselela imuli yakhe wasekubona sekufanele ukuba adinge umsebenzi.
“Ngokuswelakala kwenhlanhla izinto kazisahambanga ngendlela ebengifuna ngayo ngoba kwaswelakala ababengangixhasa ngosekelo lwemali lokungiqoqela imidlalo. Ngakhetha ukuba lami ngidinge okokwenza ukuba ngiphile ngoba amaphupho ami awasafezekanga emdlalweni wenguqu. Ngangifisa lami ukufana laboMayweather kodwa angisalitholanga lelothuba. Kwasekumele ngiphandele imuli yami lami yikho ngasengidinga umsebenzi lapha kuqembu leHighlanders owokunakekela amagceke,” kutsho uNgulube.
UNgulube, oyafikisa iminyaka engamatshumi amathathu lambili mhla zingamatshumi amabili lesithupha kuyonale inyanga kaMbimbitho, uthi kuyisifiso sakhe ukuba ngabe umdlalo wenqindi uyavuselelwa ufane njengakudala.
Lapho athola khona ithuba uyavakatshela amaqembu awomdlalo wenqindi endaweni ezitshiyeneyo edolobheni lakoBulawayo ancedise ukuqeqetsha abadlali ikanti lalabo abamlanda lapho ahlala khona uyabancedisa.
Forum