Kuqhamuke ubudlwangudlwangu emdlalweni womncintiswano wenkezo ye Bob91 Super Cup obuphakathi kweqembu Highlanders lele CAPS United enkundleni ye Barbourfields ngeSonto.
Lumdlalo usuke waphazamiswa yibudlwangudlwangu bona obuqale ngesikhathi abalandeli begcwala enkundleni besuka embankweni lase Soweto besiza endaweni ehlala izikhulu labahlonitshwa bebalekela ukunethwa lizulu eliqale ukuna lumdlalo sekumele uqale.
Uphinde wamiswa njalo umdlalo okwemizuzu elitshumi lambili ngemva kokuba abadlali beqembu le CAPS becatshulwe yindlela umdlali weqembu le Highlanders uObidiah Tarumbwa ahlohle ngayo ngoba ngalesosikhathi unozinti wabo uVictor Twaliki ubehlaselwa ngezikhali ngabalandeli beqembu le Bosso.
Udlakela olwenzakale ekupheleni komdlalo abalandeli sebebuyela emakhaya lubikwa lutshiye omunye umlandeli weqembu le Caps elimele kabuhlungu njalo isikhulumeli senhlanganiso ye Zifa uXolisani Gwesela ukhuphe umbiko wokusola lokhu kungaziphathi kwabalandeli bomdlalo wenguqu.
Isiphathamandla seqembu le Highlanders uNdumiso Gumede laye uthe bona njengeqembu leHighlanders bayakhathazeka ngezenzo zodlakela wathi kumele abazatholakala besenza lokhu bejeziswe kabuhlungu.
Emdlalweni wokudinga intshantshu zezwekazi lase Africa odlalwe ngoMgqibelo iqembu le FC Platinum linqobe ele Sofapaka ele Kenya nge 2 ka nya okutsho ukuba nxa sekuhlanganiswa lempumela eyomdlalo wehlandla lakuqala odlalelwe eKenya kumaviki amabili edluleyo iqembu le FC Platinum linqobe nge 4 ka 1 njalo lizahlangana lele Young Africans elase Tanzania kusigaba esilandelayo.
....................................................................................................................................................................................................................................................................................................................................
Sikhangele imidlalo yenguqu edlalwe kwamanye amazwe ngempelaviki;
Elizweni leNgilandi iqembu le Chelsea liphakamise inkezo ye League Cup ngemva kokunqoba ele Tottenham Hotspur nge 2 ka nya kuthi emidlalweni ye ligi sekuzakuba nzima kuqembu le Manchester City ukuba livikele isicoco seligi ngemva kokunqotshwa kwalo nge Liverpool nge 2 ka 1.
Limpumela ipha ithuba iqembu le Chelsea okuyilo elihlezi phezu kwengalane ukuba lengezelele isikhala phakathi kwalo lele City sona esikumiklomelo emihlanu okwamanje njalo iChelsea idlale imidlalo emilutshwane ngowodwa kulamanye amaqembu.
Elizweni le Spain iqembu le Barcelona livale isikhala phakathi kwalo leqembu elihlezi phezu kwengalane yemiklomelo ele Real Madrid saba yimiklomelo emibili ngemva kokuba lona linqobe ele Granada nge 3 ka 1 kwathi ele Real Madrid laba ngutshiki lobhanqa 1 ka 1 lele Villareal.
Iqembu le Real Madrid lilemiklomelo engamatshumi ayisithupha lanye kuthi ele Barca lilemiklomelo engamatshumi amahlanu lathoba munwe munye.
....................................................................................................................................................................................................................................................................................................................................
Amathuba eqembu elimela ilizwe le Zimbabwe emdlalweni kakhilikithi awokufinyelela ukuyadlala kusigaba se semi-final kumncintiswano wezizwe zomhlaba oqhutshelwa emazweni athi ele Australia kanye lele New Zealand asenciphe kakhulu ngemva kokunqotshwa elikwenziwe ngele Pakistan ngama runs angamatshumi amabili.
Kudingakala ukuba iqembu linqobe emidlalweni emithathu ukuze lenelise ukuyadlala kusigaba se semi – final kodwa iqembu le Zimbabwe lona selidliwe emidlalweni emithathu lanqoba kowodwa njalo kuzamele lidlale lele Ireland kanye lele India emidlalweni yalo eseleyo okungamaqembu adlala kuhle kumncintiswano walonyaka.
IZimbabwe izadlala le Ireland mhla ziyisikhombisa kuyonale inyanga kuthi emdlalweni walo owokucina kusibaya sika Pool B lizadibana lele India mhla zilitshumi lane njalo kuzamele inqobe kuyo yonke limidlalo ukuze ibe lethuba lokudlulela kusigaba esilandelayo.