Asekuzinga eliphezulu amalungiselelo ombukiso oqoqwe yinkampani yeZimbabwe International Trade Fair (ZITF) ozakwenzelwa koBulawayo ngeviki ezayo.
Umbukiso lo owezemigodi obizwa ngokuthi yiMine Entra, Mining and Engineering and Transport Expo wenziwa ngaphansi kwesihloko esithi ‘Resourcing the Future: Exploring and Leveraging Mining Potential’.
Isikhulumeli seZITF, uNkosazana Stella Nkomo, uthi asekuzinga eliphezulu amalungiselelo ombukiso lo owenziwa minyaka yonke koBulawayo.
Uthe kukhangelelwe ukuthi kuzabe kulamankampani angamakhulu amabili lamazwe amahlanu azabukisa okutshiyeneyo.
Embukisweni walonyaka kukhangelelwe ukuqhutshwa imihlangano emithathu ebalisa oweWomen In Mining, oweMine Conference, leYouth in Mining. Kuzagqitshwa ngomdlalo wegolf eBulawayo Golf Club.
Umphathintambo wezokwemba uMnu. Winston Chitando ukhangelwe ukuthi uzavula lumbukiso ngoLwesine ngeviki ezayo.
Kusenjalo, idolobho lako Bulawayo selixolise uzulu ngokuswelakala kwamanzi ngesikhathi kulungiswa impompi zamanzi.
Isikhulumeli seBulawayo City Council, uNkosikazi Nesisa Nyathi, uthi idolobho leli lilungisa iCriterion Water Treatment Plant lapho okugeziswa khona amanzi avela emadamu.
UNkosikazi Nyathi uthi lokhu kuzaqhubekela phambili kuze kuyefika ngempelaviki.
“Okwamanzi siyaxolisa kuzakhamizi silungisa ikusasa kaBulawayo, kukhutshwa ama motors lama valves afakwa ngesikhathi sikaSmith sifaka izinto ezintsha njalo luhlelo oluthethe imali enengi sihlangane lebhanga leAfrican Development Bank esitholise amadola eMelika afika izigidi ezingamatshumi amathathu lasikhombisa.''
