Umkhokheli wenhlanganiso yababalisi eyeAmalgamated Rural Teachers’ Union kumbe iARTUZ, uMnu. Obert Masaraure, usetholakale elecala lokuvimba umthetho. Wabotshelwa icala leli ngoNtulikazi ngomnyaka ka2022 wasevunyelwa ukuthi ahlawule isibambiso sebail ukuze athoniswe evela emzini wakhe. Uzagwetshwa kusasa.
UMantshi uFeresu Chakanyuka uthe kumele uMasaraure evalelwe ngoba kulobufakazi bokuba icala aletheswayo likhulu kakhulu njalo lilakho ukuthola isigwebo esilukhuni.
UMasaraure ubikwa waloba enkundleni eyeTwitter ekhuthaza imithethwandaba ukuba ikhulule unobhala jikelele weARTUZ, uMnu. Robson Chere. Isikhulumeli seARTUZ uMnu. Thembakuye Moyo utshele iStudio 7 kuyabethusa okwenzakala kuMasaraure olwela ababalisi ilizwe lonke jikelele.
“UMantshi uFeresi Chakanyuka uthole uMasaraure uMongameli weARTUZ elecala lokuvimba umthetho ukuba usebenze. Kusasa mhlaka 23 uzaphiwa isigwebo.’’
UMoyo uqhubeke esithi kuyamangalisa ukuba icala leli lenzakala ngoNtulikazi 2022 kodwa abatshutshisi bebethatha isikhathi eside ukuba balithonise. Uthi lokhu kubanika intshukutshu yokuqhubeka belwela ilungelo lababalisi.
“UMasaraure yindoda emele ababalisi. Ulwisana leholo lababalisi, simbona engela cala isici skahe yikumela izisebenzi. Uhulumende ufuna ukuvimba ukuba izisebenzi zikhulume ngeholo. Akusethusi ukubotshwa kwakhe njalo akusoze kumise umzabalazo wokulwela ilungelo lezisebenzi’’
Olwela amalungelo oluntu ephansi kwenhlanganiso yePeople Power, uMnu. Pride Mkono, uthi le yindlela yokuba izisebenzi zingaphakamisi amakhanda ngeholo eliphansi lesimo somnotho.
“Ukubotshwa kwakhe lokhu kwenzelwa ukuba izisebenzi zingakhulumi kakhulu lapho zincindezelwa ngoba vele ubunzima obukhona elizweni ngomnotho siyabazi. Sithi uhulumende kamkhulule ngoba engela cala.’’
Kodwa ilunga ledale leCentral Committee kubandla leZANU PF, uMnu. Munashe Mtutsa, uthi kumele abantu abaphikisa uhulumende bekwenze belandela imithetho yelizwe.
“Nxa betholakala belamacala bayasola kodwa nxa kungela cala bayathaba. Sithi thina umuntu wonke kakhangelane lokuvuselela umnotho hatshi ukufuna ukuphikisa nje kuphela.’’
UMasaraure wabotshelwa icala leli ngomnyaka ka 2022, kodwa waqhubeka ngomsebenzi wakhe wokumela ababalisi bona abathi iholo abaliphiwa nguhulumende liphansi kakhulu.
Ingcitshi ezicubungula ezamalungelo ezisebenzi zithi uMasaraure uhlukunyezelwa ngomsebenzi awenza ngesikhathi owayengummeli weZengeza edale lephalamende, uMnu. Job Sikhala, esejele lapho ayeyisikhulumeli sakhe njalo ekhuthaza kakhulu ukuba akhululwe.
Kusenjalo, idale leHigh Court namuhla lidlulisele phambili isicelo sika Neville Mutsvangwa sokuhlawula isibambiso sebail. UNeville yindodana yomphathintambo kahulumende obona ngezabesifazana lamabhizimusi uNkosikazi Monica Mutsvangwa lesikhulumeli seZANU PF uMnu. Christopher Mutsvangwa.
UNeville ubotshwe ngeviki edluleyo esetheswa icala lokuthenga lokuthengisa imali okungekho emthethweni. Umthethwandaba unqume ukuba aphenduke ngoMvulo ngeviki ezayo.
Forum