Usibalukhulu webhanga lesizwe ele Reserve Bank of Zimbabwe uthi ukukhweza iholo ngalesisikhathi kuyahle kuqedise inotho yelizwe ivele yona ibhidlikile kodwa okudingakalayo yikuthi kwehliswe intengo yempahla ukuze abantu benelise ukuthenga baziphilise ngayo imali abayitholayo.
Ekhuluma emhlanganweni labosomabhizimisi koBulawayo ngoLwesine ekuseni ngodaba lokulethwa kwemali yamatshe esisebenza eZimbabwe, uDr John Mangudya uthe kumele kunanzelelwe ukuthi osomabhizimisi abenelisi ukuthengisa impahla yabo ngoba abantu bathenga impahla ezivela kwamanye amazwe ezilentengo ephansi.
Uthi impahla zakuleli zilentengo ephezulu ngenxa yokuswelakala kwentshintshi njengoba yonke impahla ibiqalisela kudola leMelika. Ukukhweza iholo, uthi akungeke kwaqeda udubo olukhona ngoba osomabhizimisi baqila abantu ngentengo evele iphezulu.
UDokotela Mangudya uthi ilizwe lithwele nzima ngoba akukho muntu osathemba izinqumo zebhanga lakhe okuyikho okwenza bangathakazeleli ukusebenzisa imali le yamatshe. Uthi bake badinga ukuthi bathole yona imali yamatshe yeMelika uqobo kodwa kwehlula ngenxa yendleko zakhona.
Wengeze esithi inotho yakuleli ingeke yasebenza ngemali yeZimbabwe kungakho akukho umuntu okumele ahlalele evalweni ethi uzalahlekelwa yimali.
Usomabhizimisi wezimota ezihamba abanengi, uMnumzana Albert Ncube ongumqondisi kuBulawayo Public Transporters Association, uthi akusiqiniso ukuthi bona abayifuni limali kodwa ivele ayiyinengi kulelidolobho. Uthi yona ingcono ayifani leye Zansi Africa, eyamarand ngoba lapho besiyathenga iyaguqulwa icine ithenga impahla elutshwane ngoba idola leMelika selaqina.
Abaqoqi balumhlangano, inhlanganiso yabosomabhizimisi, iZimbabwe National Chamber of Commerce ithi bekuqakathekile ukuthi kuphathwe lumhlangano ukuze kuxazululwe ukuthandabuza okukhona ngokusebenzisa imali le.
Umnumzana Velile Dube, okhangela ukuhanjiswa kwembiko kulinhlanganiso uthi bekuqakathekile ukuthi umqondisi webhanga azizele yena mathupha azoxoxisana labantu bengezwa ngabasiki bebunda.
UDr Mangudya uthi uzakwethula izinqumo zebhanga, iMonetary Policy, kumaviki azayo kungakho lumhlangano umnike amanye amacebo lembono azakuyayicabangisisa. Ngemva kwalumhlangano uMangudya wethekele indawo yamafekithali ukuyabona umumo okhona anduba abuyele esigodlweni.