Ukuxotshwa kweziphathamandla kubandla leZanu PF okulokhu kuqhubekela phambili kusukela ngomnyaka odluleyo sekutshiye uzulu edideke ingqondo, ezibuza ukuthi kuyini okungabe kusenzakala.
Imibuzo iza ngemva kokuba umongameli Mugabe ethe laye kuyamkhathaza ukuxotshwa kwenkokheli yebandla.
NgoLwesithathu idale leCentral Committee lixotshe abathathu ababalisa owayengumphathintambo kahulumende, uMnu. Sylvester Nguni kwamiswa ukuba ngamalunga abayisikhombisa.
Kodwa uMongameli Mugabe usole ukuxotshwa lokhu esithi kanti kungani kungakhulunyiswana kukhunyiswane umlotha anduba kuxotshwe abantu? Lokhu kwenzakala phambilini komhlangano omkhulu webandla owenziwa edolobheni le Victoria Falls.
"UKhetho lukhatshana lungomnyaka ka 2018 kodwa bakhona abaxabanayo phezu kodaba lwezikhundla. Yekelani lumkhuba," kutsho uMugabe.
UMugabe wengezelele esithi wesabela ukuthi ibandla lingacina lidabuka phakathi ngenxa yokuxabana lokhu.
Lanxa lumhlangano ungayisiwo wokukhetha inkokheli kulokuphithizela kulandela imbiko ethi sekulamaxuku amabili, elinye likhokhelwa ngomsekeli kamongameli, uMnu. Emmerson Mnangagwa elinye njalo lithiwa likhokhelwa nguNkosikazi Grace Mugabe.
Amaxuku la abikwa edonselana kubangwa amandla ukwenzela ukuthi uMongameli Mugabe engasuka esikhundleni amaxuku la angene embusweni.
Ukuhlaziya loludaba uChris Gande wesStudio Seven uxoxe lengcwethi ecubungula ezombusazwe, uMnu. Brilliant Mhlanga endawonye lesiphathamandla sebandla lePeople's Democratic Party, uMnu. Edwin Ndlovu onguye osungula lingxoxo.
UNdlovu uthi konke okwenzakalayo ebandleni kuyaziwa nguMongameli Mugabe ngoba uyabe efuna ukuthi kwenzakale ngaleyondlela.
"Kule one centre of power ku Zanu PF engumongameli Mugabe.Yiko konke okwenzakalayo nguye okufunayo. Abaxotshwayo nguye ofunayo kodwa nxa esesebantwini uyenza ungani kayisuye," kutsho uNdlovu.
Kodwa uMhlanga uthi kavumelani laye. Uthi umongameli mugabe usekhulile njalo okwenzakalayo ebandleni kasazkwazi.
"Nxa engasakwanisi ukuthi axhase iparty le iye phambili we are bound ukubona into ezinjangalezi zisenzakala. Ama faction esebizana amagama okuyinto ebesingayazi kuminyaka engu 15 edluleyo," kutsho uMhlanga.
