Abesifazana abakubhizimusi lemisebenzi yezandla yokweluka impahla ezinjengengcebethu, amacansi lokunye kokucecisa bethengisa, abasebenzela eLupane bakhala ezimathonsi ngodubo lwendlaka ebangelwe yikungananga kuhle kwezulu osekubadalela uhlupho lokutsha kwelala abalisebenzisayo abathi kuzakwenza ibhizimusi labo lehle kakhulu.
UMqondisi weLupane Women’s Development Centre, uNkosikazi Hildigard Mufukare uthe ibhizimusi lamabhasikiti lihle lobanje ukuguquka komumo womkhathi okwenze isigaba sabo sangatholi izulu elihle sekuphazamisa isivuno sesilimo selala abalisebenzisayo emsebenzini wabo.
''Sikhangele ukuthi uma sikhangela intuthuko eyaphambili sikhangelele ukuthi ilala limile, ukungani kuhle kwezulu kuzasiphazamisa kubhizimusi yethu ngoba kulibhizimusi elihle, Ilala lidinga amanzi amanengi njalo okwamanje uma sifuna ukulima izilimo ezidliwayo ngeke silime ilala endaweni yethu.''
UNkosikazi Tryphine Mlilo osuka ePupu Ward uthi lelala elincane elikade selihlumile inkomo sezilidlile laphela duu.
''Vele asikwazi, ibhizimusi lethulokuthunga ingcebethu belihamba. Siyabona ukuthi sizathwalanzima ngokoma lokhu esibhekane lakho. Amanzi sikha kude le kumfula uTshangani ngamadonki. Siyafisa ukuba uhulumende angenele ngoba lelala ebelimilile seliqedwe zinkomo.''
UNkosikazi Emily Ncube osuka eDaluka Ward koSivalo uthi abasakwazi ukuthi babambephi ngoba emasimini lezifuyo kunzima akukhulumeki.
''Njengba izulu lingani asazi ukuthi siyaphephelaphi besithembe lona ilala. Emasimini asilalutho. Izifuyo sezilomkhuhlane wesikhumba. Bakhona abantu abadala abahola ukudla kuhulumende kodwa abane kunzima ngitsho Labantwana ezikolo kunzima ngabe uhulumende uyangenela ngoba lokuncane engikutholayo kuhle kuthenge ukudla akweneli ukubhadalela abantwana esikolo.''
ELupane inengi labesifazana labasakhulayo sebephila ngokuthunga izitsha, amacansi lokubaza impahla ezehlukeneyo kodwa bakhala kakhulu ngokuthi ukungani kwezulu lonyaka kuzabangela ukuba baphile nzima okwesikhatshana ngoba ilala abakade bephephela kulo alihlumanga ngendlela abakade beyikhangelele.
Abantu abanengi eZimbabwe abala misebenzi ngakhoke sebegcwele emisebenzini yezandla kodwa inengi lale imisebenzi igxile kwezokulima langokuthi izulu liyabe line njani lowo mnyaka ngoba lalapho okuqhutshwa imisebenzi yokulima ngokuthelezela umsebenzi kawuhambi kuhle ngoba amadamu okumele bawasebenzise lawo engela manzi kumbe agcwele itshebetshebe ngoba engalondolozwa kuhle.
Uhulumende uhlala ekhala ngokuthi ubhekane lenhlupho zokuswela imali yokulondoloza amadamu kanye lenhlelo zokwenqabela inhlupho ezidalwa yikungani kuhle kwezulu, ezokuguquka komkhathi lokunye.
