Izakhamizi zemhlubulweni wesigaba se Matabeleland North lese Matabeleland South sezibhekane lohlupho lokusilela kwamanzi osokutshiye zithola amalitha amatshumi amane ngelanga ngemizamo yokuwalondoloza, ngesikhathi ingcwethi kwezokulima zisithi imihlambi yenkomo lezinye izifuyo lazo zisengozini ngenxa yokuswelakala lokhu kwamanzi.
Lanxa sokwaba yinsakavukela umchilo wesidwaba lokhu kusilela kwamanzi, lonyaka kuze ngamandla ngenxa yokungani kuhle kwezulu kuminyaka embalwa esanda kudlula.
Kuthi ngapha ilanga lalo litshisa liqothule umhlabathi, likhupha inhlanzi emanzini.
UNkosikazi Keitumetse Tlou, oweGungwe eGwanda, uthi lanxa umango wakibo wawuvele utshisa, izulu lingani ngendlela, okweminyaka le sokungaphezu kwenjwayelo osokutshiya lezibhorane zitshile amanzi.
Amanzi asefolelwa nsukuzonke ngoba izikotsho zilala zikhiyiwe ukuze wonke umuntu enelise ukuthola amanzi ngokulingeneyo.
Izifuyo, uthi, akusela owenelisa ukuzinathisa ngaphandle kokuthi umuntu ahambe lazo amakhilomitha angaphezu kwamatshumi amabili ukuya emfuleni uTuli lapho okuseselamanzi endaweni ezimbalwa.
UMnu. Alois Mbedzi owakulumhlubulo laye, uthi izikotsho zakulindawo sezigugile lazo njalo ezinengi zazingagejwanga zatshona kakhulu ngoba ngesikhathi zifakwa kwakungakabi lokuguquka komkhathi osokwabakhona.
Izikotsho lezi, uthi sezihlala zisifa njalonje ngoba amanzi asekhatshana okumele ziwadonse.
Kubikwa sokufe inkomo ezilitshumi kulumango phezu kwamakhulu amathathu enkulungwane – 350 000 elibikwa lisengozini ngenxa yokuswela amanzi.
Inhlanganiso ezimele yodwa iUnited States Aid for International Development (USAid), ibambane le World Vision le World Food Programme, isisungule uhlelo lokuphathisa izakhamzi ezibhekane lendlala lokusilela kwamanzi kuhlelo lwe Lean Season Assistance.
UMnu. Obadiah Masuku, yisakhamuzi kuWard 8 eHwange. Uthi inhlanganiso lezi ziyaphathisa kodwa ezinye indawo lapho okugejwa imigodi yamanzi kutholakala kungela manzi kuthi kwezinye indawo kube leziduli phansi okwenza kubenzima ukuqhuba lumsebenzi.
Ithemba labo, uthi lisekuthini inhlanganiso lezi zingadeli ukubasiza ngoba bengasala bengasibantu balutho.
Ophethe iUSAid kuleli, uNkosikazi Stephanie Funk, uthi kumele kukhangelwe sona isiqokoqela esenza kuswelakale ukudla lamanzi kulungiswe hatshi ukutshona kukhangezwa abantu minyaka yonke.
Ngenxa yalokhu, uthi inhlanganiso yakhe iqakathekisa inhlelo ezenza abantu benelise ukuzilimela ukudla kanye lokufuya, bathole amanzi aneleyo ukwenzela ukuthi lalapho indlala ifika ibathole belalapho abangabamba khona.
Ababona ngezomkhathi, sebexwayise ukuthi izulu lilakho ukusilela njalo lonyaka. Ngimele iStudio Seven, nginguNothando Sibanda.
