Ikhansili yakoBulawayo isinqume ukuthi ikhulumisane lomphathintambo wokubuswa kwezabelo ukuthi iyivumele iqhatshe kumbe idinge kwamanye amankampani ingcitshi zokulungisa impompi zamanzi ngoba amanzi amanengi ayalahleka ngenxa yokuswelakala kwabantu abazilungisa ngesikhathi.
Impompi ezisebenza kulelidolobho ngezakudaladala esezihlezi zidabuka njalonje osokwenze udubo lokuswelakala kwabomanjinela luthwalise nzima ikhansili lozulu.
Omanjinela bedolobho leli, bathi okwakhathesi balengcitshi zamanzi ezilitshumi lanye ezibhekana lempompi ezingaphezu kwekhulu – 133 000 kodwa amadolobho amancane alengcitshi itshumi lane zikhangele impompi eziphezu nje kwetshumi lenkungwane – 14 000.
Umeya wedolobho, uMnumzana Martin Moyo, uthi amanzi ayalahleka edolobheni ngenxa yempompi ezivuza njalonje zingela ozivala ngesikhathi.
Uthi lanxa nje befuna ukuqhatsha omanjinela abatsha kazi ukuthi bazabhadalwa ngani ngoba uhulumende uthi iholo lezisebenzi zonke ekhansilini lingadluli amatshumi amathathu ekhulwini – 30% lemali yonke etholwa yikhansili.
Abantu kababhadali indleko zabo ngendlela, athi yikho befuna ukufaka amamitha amanzi abhadalwa umuntu engakawasebenzisi ngoba lokhu kuzakhuthaza ukuwalondoloza kanye lokuletha imali ezenza ikhansili yenelise ukubhadala izisebenzi ezidingayo.
UMnumzana Saziso Mathe, osebenza lekhansili uthi, uyananzelela ukuthi ikhansili iyadinga izisebenzi zokulungisa impompi zamanzi ngoba inengi lalezo eziseleyo ngezingawufundelanga umsebenzi okwenza kubenzima ukuthi ziwuqhube ngendlela.
Kuyadingeka ngakho ukuthi nxa imali ivuma, kuqhatshwe izisebenzi ezilolwazi lwakulezi insuku lokulungisa impompi lokulondoloza amanzi avele evame ukusilela kulelidolobho.
UNkosikazi Nomagugu Nkomo, isakhamuzi koBulawayo, uthi ikhansili ilezisebenzi ezinengi kakhulu kungakho ingakadingi ukuqhatsha kumele ixotshe labo abangela msebenzi abawanzayo ukuze imali ebabhadalayo isebenze kulabo abaqakathekileyo.
Ikhansili yakoBulawayo isiyehluleke ukuqhatsha izisebenzi lokhu yamiswa ngowayengumphathintambo wokubuswa kwezabelo uDr Ignatious Chombo. Umhlangano wokucina wekhansili waveza ukuthi ngenyanga kaNkwenkwezi kuphela ikhansili yabizelwa impompi ezidubukileyo phose inkulungwane -990 njalo ngalanga linye ibizelwa okuyabe kungahambi kuhle phose endaweni ezilikhulu – 90.