Uzulu labamabhizimusi sebesole kakhulu ukukhuphulwa kwentengo yamafutha ezimota, bethi lokhu kuzakhokhelela ekukhwezweni kwendleko zokuqhuba umsebenzi kumabhizimusi kanye leyentengo yempahla yonke nje elizweni.
Usomabhizimusi wakoBulawayo umnunzana Mkhokheli Ndlovu uthi intengo yamafutha ezimota yiyo ebafuqa ukuthi bakhweze intengo yempahla abayithengisayo.
“Ukukhwela kwefuel kuyadala ukuthi izinto lazo zikhwele emashop, thina njengabathengisi siyabe sesikhweza izinto amacustomer ayabe esebona angathi sesifuna ukugainer kakhulu kukanti hayi nxa I fuel ikhwela lezinto zonke ziyakhwela ngoba yiyo econtroller amaprize esikhathini esinengi.”
Unkosikazi Sanele Sibanda oyisakhamuzi sakoBulawayo uthi lokhu kwengezelela kunhlupho abavele bebhekane lazo.
“Nxa sikhangela isiikhathi esisiqede singasebenzi ngelockdown besilesifiso sokuthi ngabe uhulumende ubezakhangela izinto ezenzakalayo asizwele ngoba lapha esiyakhona asisakwazi sokungathi kulabanye okumele baphumelele ukwedlula abanye okuyinto embi kakhulu aluba kukhona okwenziwayo ngoba ukukhwela kwefuel from USD1. 23/litre to USD1.30 /L ipetrol inengi kakhulu ”
Umnunzana Dumisani Nkomo ingcwethi ecubungula ezomnotho njalo engumqondisi wenhlanganiso yeHabakkuk Trust uthi lokhu kuzaguqula into yonke.
“Ukukhwela kwentengo yamafutha okugoqela ipetrol le diesel kuzakwenza izinto ezinengi eziswelakalayo nsukuzonke ukubana zikhwele. Yonke into ilendleko yefuel so okuzakwenzakala yikuthi izinto ezinengi sizabona zikhwela kugoqela ukudla lempahla konke nje okunengi kuzakhwela ngoba kuyonke into esilayo kulendleko yamafutha yikho okuzayenzakala ngoba amafutha aqakathekile ngoba konke okwenzakalayo kulendleko yamafutha.”
Umqondisi wenhlanganiso ebona ngezelungelo labathengi eyeNational Consumer Rights Association i-(Nacora) umnunzana Effort Ncube gcizelela kulokhu.
“Ukukhwela kwamafutha ezimota kuzakwenza ukuthi zonke izinto zikhwele, kuzakhwela itransport kuzakhwela impuphu yonke into ngokuba konke kwenziwa kumbe kuhamba ngamafutha ezimota ngakho ke ukukhwela kwawokukhweza yonke into kwenza impilo ibe nzima kulalokhu ade iyikho khona. Yinto ebuhlungu kakhulu ukuthi abantu beZimbabwe lokhe bedlula phakathi kobuhlungu obungaka bezinto ezidulayo. Uhulumende uyehluleka ukuthi ayibambe kahle i economy isebenzele wonke umuntu hayi abalutshwane.”
Imizamo yokuxhumana lesikhulumeli sohlangothi lukahulumendeolubona ngezamandla omlilo. olweZimbabwe Energy Regulatory Authority umnumzana Aerial Sibanda yehlule ngoba ubengaphenduli ucingo lwakhe. Kodwa umbiko owethulwe luhlangothi lwakhe olweZERA uveza ukuthi uhulumende usevumele ukuthi amafutha ezimotha akhwezwe esuka ku US$1.23 isiya kuUS$1.30 kulitha lepethulo, kuthi idizili iyekuUS$1.32 kulitha.
Leyi intengo iphezulu kakhulu nxa iqathaniswa lamanye amazwe asemhlubulweni wangezansi yezwekazi le Africa eseSADC. Kwele South Africa ipethulo ingamacenti eMelika US$0.95 yikuthi idizili ilidollar US$1.05.
