Abatsha bakhala ngokwenziwe nguhulumende osemise ukufundiswa kwabongi ezibhedlela.
Bathi lokhu akuhambelani lokwethulwa nguhulumende kaMongameli Emmerson Mnangagwa othi ilizwe leZimbabwe lifuna osomabhizimusi bakwamanye amazwe bavule amafekithali elizweni.
Omunye wabazondiswe ngumbiko kahulumende owethulwe ngoLwesibili nguNkosazana Nancy Stevens oseleminyaka emihlanu edinga indawo yokufundela ubongi.
UNancy uthi wabizwa kathuthu lapho akhuluma khona leziphathamandla zesibhedlela seMpilo kodwa kazange angene kuhlelo lokufundisa abongi.
“Kubuhlungu shuwa ukuthi iminyaka engu-five ngidinga indawo ngibizwa kuma interviews ngingenelisi ukuthi ngingene kuhlelo lweNursing. … Siyaze sifike iminyaka engu-thirty singakayitholi indawo. Kodwa lokhe silethemba lokuthi sisebenzele uhulumende wethu. Kodwa bathi iZimbabwe is open for business, senzeni thina nxa kunje so. Lokhu asikufuni.”
UNkosazana Nothabo Nyathi yena uthi abatsha badanile kakhulu ngokwethulwe nguhulumende omise uhlelo lokufundisa abongi eZimbabwe.
“Thina njengabasakhulayo lapha eZimbabwe besikhangelele ukuthi uhulumende lo omutsha uzasipha imisebenzi. Pho-ke sithe sisizwa ukuthi sebezakuma ukuqhatsha abantu kuNursing ngomnyaka ozayo, asisakwazi ukuthi sizaqhatshwa ngaphi ngoba kukhanya bebengasabhadalisi imali zokungena. Besikhangelele ukufaka ama applications ethu. Langaze uthi uyazama ukuthengisa abavumi bayakugijimisa. So, asisakwazi ukuthi uhulumende ucabangani ngathi.”
Abanye abatsha bathi le yimizamo kahulumende yokuthi bayekuhlelo lweNational Youth Service oluzavuselelwa nguhulumende ngomnyaka ozayo.
Abogatsha lwezempilakahle abakhulumanga ukuthi balumiseleni uhlelo lolu.
