lnengi labantu eZimbabwe selibona kungcono ukusebenzisa imithi yendulo ngoba libhekane lobunzima bokufinyelela intengo yemithi yangalezi nsuku etholakala emavinkilini athengisa imithi yamapharmacy kanye lokuhlawulela usizo lokwelatshwa ezibhedlela ngenxa yokungamanga kuhle komumo womnotho welizwe.
UNkosazana Ashlas Sibanda uthengisa imithi yendulo ehloliweyo edolobheni lakoBulawayo.
''Abantu bayayithena imithi yesintu njalo bayayithakazelela. Intengo yemithi yesintu iphansi uma iqataniswa leyezibhedlela njalo yimithi ejwayelwe ngabantu. Sithenisa imithi ehlukeneyo eyelapha umzimba womuntu kungela bunzima.''
Uqhubeke uMaSibanda, echasisa ukusebenza kwemithi abalayo ehlukeneyo ethengwa ngabantu.
''Silembiza ethathwa nguMaba loBaba bobabili okwenyanga njalo uma umuntu enabuya eula iBP asimelaphi yona yodwa kodwa sihle selaphe umzimba wonke.''
Ubuhle bemithi yendulo uNkosazana Sibanda uthi ayila okwengezelelwayo okungalimaza umzimba ngoba ngeyemvelo.
''Ubuhle bemithi yesintu yikuthi yimithi eyaziwayo ebivele iselapha abantu endulo njalo ayibangeli eminye imikhuhlane emzimbeni uma iqathaniswa lamaphilisi asezibhedlela.''
UMnu Bakidzanani Dube uvumelana loMaSibanda ethi imithi yendulo ilungile ngoba labapheka imithi yesilungu bayithatha kumithi yesintu beyihlanganisa leminye.
''Osekusele yikuthi abantu basebenzise imithi yesintu noba abantu abaselamali yokuthena imithi yesilungu noba isimo sentengo yemithi yesilungu iphezulu njalo ayitholakali. Imithi ethengiswa ezibhedlela ivele isuka kumithi yesintu ngakhoke abantu abaqine emithini yesintu.''
UMnu Mbekezeli Ncube uthi ukusebenza kwemithi yendulo akumangalisi ngoba okwamanje izwe liphakathi kobunzima uma kukhangelwa ezempilakahle.
''llizwe lethi libhekane lobunzima ngakhoke kwezempilakahle sekuzakubalulaukuba abantu basebenzise imithi yendulo noba ihlala ikhina njalo ayiduli futhi iyatholakala sikhathi sonke.''
UMnu Thomas Sithole uthi inhlawulo ezisezibhedlela zenza abantu bengenelisi ukuyathola usizo khona kodwa baphephele emithini yendulo.
''Inhlawulo esizibona esibhedlela zenza ukuba inengi labantu lingenelisi ukuya ezibhedlela kodwa baphephele emithithini yendulo. Udubo olukhina yikuba sekulemithi esuka phandle kwelizwe enekho kahle njalo isithethe imiphefumulo yabanengi. Sekuzakuba lula kuzulu ukuba aphephele kumithi yendulo ukuze aphile.''
Imithi yendulo isivamile emavinkilini athile akoBulawayo. Eminye yankona isuka kwamanye amazwe awezwekazi leAfrica kuthi eminye ngesisuka phetsheya kolwandle njengaseChina.
Emkhambo wemithi eMakokoba koBulawayo, inengi labantu abakubhizimusi lokuthengisa imithi yendulo bathi inani labantu asebethenga limithi selikhuphuke kakhulu njalo sekubapha ibhizimusi.
