Umanyano wenhlanganiso ezilwela amalungelo ezakhamizi owe Harare Metropolitan Residents Forum usucele uMongameli Robert Mugabe losikomitshi wamapholisa uMnu. Augustine Chihuri ukuthi ukuthi bengenele kudaba lokudilizwa kwezindlu e Chitungwiza leEpworth.
Ekhuluma emhlanganweni lentathelizindaba ngoLwesithathu, omunye wabagcinisihlalo balinhlanganiso, uMnu. Simbarashe Moyo uthe kufanele kulandelwe isisekelo sombuso, sona esikuveza sobala ukuthi umuntu wonke ulelungelo lokuthi abelendawo yokuhlala.
Lokhu kulandela uhlelo lukahulumende olusaqhubeka, lapho okudilizwa izindlu lezakhiwo zokuthengisela eChitugnwiza le Epworth ezakhiwa ngokungekho emthethweni.
Ngakwelinye icele, umphathintambo wezabelo uMnu. Ignatious Chombo ubikwa esithi amakopa ezindlu ama housing cooperatives, kufanele asebenzelane lamabhanga lapho esabela abantu izindlu kumbe indawo zokwakhela ukwenzela ukuthi kungabi lokuqilibezelana.
Ukuze sizwe okunengi ngodaba lokudilizwa kwezindlu, sixoxe loMnu. Marvellous Khumalo, umgcinisihlalo we Chitungwisa Residents Association, oyisiphathamandla se Harare Metropolitan Residents Forum.
Lanxa umanisipala weChitungwiza esala ukuthi uphikise isinqumo somthethwandaba ediliza ezinye izindlu, uMnu. Khumalo uthi lokhu ayilo iqiniso njalo kufanele abadiliza lezizindlu bebotshwe.
