Ukhetho lokudinga inkokheli entsha eyenhlanganiso ye Zifa luzaqhutshwa ngoMgqibelo esigodlweni iHarare.
UMongameli omutsha wenhlanganiso yeZifa uzakwazakala ngoMgqibelo ngemva kokhetho oluxega amadoda amane abalisa uPhilip Chiyangwa, uTrevor David Carelse – Juul, uLeslie Gwindi kanye lo James Takavada.
Abalandeli bomdlalo wenguqu abanengi bakhanya besekela ukuba usomabhizimisi uCarelse – Juul, yena oke wakhokhela inhlanganiso yeZifa kudala ngeminyaka yabo 1990, aphinde athathe lesisikhundla nxa kukhangelwa ingxoxo ezilotshwa emakhasini ehlukeneyo ebulenjini.
Loba kunjalo abayibo abalamandla okukhetha inkokheli entsha ngamakhansila angamatshumi amahlanu lathoba minwe mbili amela ingatsha ezitshiyeneyo ezomdlalo wenguqu elizweni.
Ukhetho lokudinga umsekeli kamongameli wenhlanganiso ye Zifa luphakathi kuka Lincoln Mutasa lo Omega Sibanda ikanti abalitshumi abadinga ukuvotelwa ukuba babe ngamalunga eboard ngabagoqela owayengumdlali weqembu lama Warriors uEdzai Kasinauyo, owayengunompembe uWilfred Mukuna, uJoseph Musariri, uLewis Uriri, uPiraishe Mabena, uBeadle Gwasira, uJackson Munyaka, uFelton Kamambo, uMusa Mandaza kanye lo Philemon Machana.
Abane kuphela phakathi kwalaba abalitshumi yibo abazakuba ngamalunga eboard ye Zifa ngemva kokhetho.
Inkokheli entsha ezakhethwa kusasa izaphatha izikhundla okweminyaka emibili kuphela njengoba izabe iphutshisa indima etshiwe yinkokheli ebiholwa nguCuthbert Dube yona eyaxotshwa ezikhundleni isetheswa umlandu wokwehluleka ukuqhuba umsebenzi ngemfanelo.
*****************
Kolunye udaba olumayelana lomdlalo wenguqu imidlalo eyomncintiswano wenkezo ye Easycall Cup ingena kusigaba se semi - final kusasa lapho iqembu le Chicken Inn elizadibana khona lele Caps United ku semi – final yakuqala enkundleni ye Barbourfields ko Bulawayo.
Abalandeli bomdlalo bazaphindela njalo emagumeni langeSonto belanda umdlalo we semi – final yesibili lapho iqembu le Highlanders elizadlala khona lele Dynamos.
Ekhuluma lentatheli omunye wabaqeqetshi beqembu le Highlanders uCosmas Zulu uthembise abalandeli baleliqembu ukuba bazathokoza ngeSonto.
Amaqembu azaphumelela kulimpelaviki azadibana ku final ngoMgqibelo ozayo enkundleni ye National Sports Stadium esigodlweni iHarare.
