Abezindaba abeUnited States Agency for Global Media (USAGM) babike ngoLwesihlanu ukuba owayeyintathelizindaba oselandela ezombusazwe, uKari Lake, usengumcebisi wayo.
ULake oleminyaka eyintathelizindaba engamatshumi amathathu - 30 wakhethwa nyakenye nguMongameli Donald Trump ukuba akhokhele umsakazo weVoice of America.
Sokuthethe isikhatshana ukuba uLake angene esikhundleni lesi ngoba kusalungiselelwa ukukhethwa lidale leSenate kuka L. Brent Bozell III, umlobi olandela ezombusazwe ezithakazelelwa ngababizwa ngokuthi ngama conservatives.
I-U.S Agency for Global Media isamelele ukuba kukhethwe iqula elilawula ukusebenza kweUSAGM elamalunga ebandla elibusayo leliphikisayo ezasebenza lomqondisi wayo ekuqhatshweni lokuxotshiswa umsebenzi kwabakhokhela inhlangothi ezitshiyeneyo.
URoman Napoli, ophethe okwesikhatshana isikhundla sowayengumkhokheli weUSAGM uAmanda Bennet owatshiya umsebenzi lo, ubikele isizebenzi ngokuqala umsebenzi kuka Lake esebenzisa incwadi yebulenjini.
UNapoli uthe uLake uzalobungcitshi bokuthapha izindaba okugoqela ukusebenza kwakhe emsakazweni okweminyaka engamatshumi amabili lapho ayekhokhela inhlelo ezitshiyeneyo njalo wasebenzela amankampani ezindaba amanengi.
UNapoli uthe uLake waxoxa labomongameli ababili njalo wathola izicoco ezimbili zokuloba izindaba eze-Emmy Awards.
Uthe uLake ongumcebisi kahulumende kaTrump uzasebenza gadalala ukuze iUSAGM ilandele iziqondiso ezilawula ukusebenza ngendlela ephezulu kulabantu abakhaliphileyo kulokhu abakwenzayo kunhlangothi zonke njalo labathola imali kahulumende abasebenza layo.
IUSAGM ilenhlangothi ezinengi ezithapha izindaba njalo lezivimba ukuba kubikwe ngokufaneleyo. Imisakazo yayo ilalelwa ngabantu abafika izigidi ezingamakhulu amane lamatshumi amabili – 420 million – ngeviki. Ilenhlangothi ezithi – VOA, Office of Cuba Broadcasting, iRadio Free Europe/Radio Liberty, Radio Free Asia, Middle East Broadcasting Networks, Open Technology Fund leFrontline Media Fund.
Phezu kokuba lenhlangothi ezizimeleyo, iUSAGM ithi imele ukubika, ukukhulumisana lokuxhumanisa abantu emhlabeni wonke jikelele isenzela ukusekela ukukhululeka kwabezindaba lezombusazwe.
Elobela izisebenzi, uNapoli uthe uLake ololwazi olumangalisayo kwezokuthapha izindaba, uzakhuphula izinga lokusebenza kohlangothi lolu ekwethuleni iziqondiso lenhlelo zikahulumende kaTrump emhlabeni wonke jikelele.
Ababona ngokwethulwa kwezindaba zeUSAGM kabakakhulumi ngodaba lolu loba sibacele ukuthi besiphe imibono yabo.
Kulomthetho ovimba abeUSAGM ukuba bengenele kwezokwethulwa kwezindaba zinhlangothi zayo zonke.
Inhlangothi zeUSAGM zivimba ukwethulwa kwemibiko engaqondanga emhlabeni wonke jilelele. Lokhu kwaqala ngesikhathi sempi yamazwe wonke eyeWorld War II ngesikhathi kusethulwa imibiko yodlame ngabeNazi Germany.
Kodwa kulabanye abathi kayibiki ngemfanelo, kayiqhubi kahle umsebenzi njalo kayikwazi ukuhlela abantu abayisebenzelayo.
ULake wakhuluma ngalokhu emhlanganweni weConservative Political Action Conference oqhutshelwe eWashington DC ngeviki ephelileyo.
Wathi esengumqondisi weVOA, uzakhuthaza ukuba kubikwe izindaba ngokuzethula zinjalo njalo ngendlela esuthisayo.
ULake wathi, “IVOA isileminyaka engamatshumi ayisitshiyangalombili lantathu 83 years ibikela uzulu ngokwenzakala elizweni leli. Kwesinye isikhathi yethula izindaba ezimqotho kuthi njalo iphinde yethule okungaqedakaliyo. Silwa impi yokwethulwa kwemibiko ngakho-ke akula okunye okwedlula iqiniso. Ngilethemba lokuthi iVOA yisikhali esingasisebenzisa.”
Omunye wabathi iUSAGM kumele ivalwe nguElon Musk, umcebisi kaTrump.
ULake uphinde wathi, “Kasisoze sibe yiTrump TV njalo kasisoze sibe yi’TDS TV’. Lokho okweTrump Derangement Syndrome lingakuthola eCNN, MSNBC, PBS, ’60 Minutes’, The Washington Post leThe New York Times.”
Ngaphandle kokuba yintathelizindba, uLake ukewangena kwezombusazwe.
Watshiya umsebenzi wakhe emsakazweni weArizona lapho athi kwakusethulwa amanga ngobhubhane.
Kaphumelelanga kukhetho lukasibalukhulu wesabelo seArizona. Waphanyeka udaba lolu emthethwandaba. Wazama njalo ukuba nguSenata kodwa kwehlula.
Udaba lolu lulotshwe nguJessica Jerreat weVOA
Forum