Owayengumongameli weMelika uJimmy Carter obhubhe ngeSonto ubeseleminyaka yokuzalwa elikhulu – 100.
Intathelizindaba yeVOA uKane Farabaugh waloba okunengi ngempilo kaCarter engumongameli njalo esesukile embusweni lapho ayesebenza gadalala kwezempilakahle emhlabeni wonke jikelele lokuthi kube labohulumende bakazulu.
Intathelizindaba yeVOA uKane Farabaugh uhlolisisa impilo kaCarter owabangumongameli owamatshumi phose amane wakweleMelika – 39.
UJimmy Carter wathi engena embusweni mhlaka 20 Zibandlela ngomnyaka ka1977, wathembisa ukubumba uhulumende ofana xathu lozulu.
“Akula obunye ubuhle obungedlula usuku lolu lapho esiqala khona ukulungisa uhulumende okhululekileyo okhuthaza ukuthula emhlabeni wonke jikelele.”
Ngumhlaba owaqhubekela phambili ewuthakazelela loba waba sembusweni okwesikhatshana eWhite House. Wathola isicoco seNobel Peace Prize njalo wakhokhela inhlanganiso ezimeleyo eyeCarter Center eyayikhuthaza ukuthula, ukulwisana lemikhuhlane njalo lokunika abantu ithemba lakusasa.
“Ngibona iCarter Center iyingxenye yalokhu engangizama ukukwenza ngingumongameli.”
UCarter wazalelwa ePlains esabelweni seGeorgia ngomnyaka ka1942. Waphutsha izifundo zeU.S. Naval Academy ngomnyaka ka1946 wasesiba kubutho engakabuyeli azalelwa khona ngomnyaka ka1953 epulazini likayise owayesedlule emhlabeni.
UCarter wangena kwezombusazwe ngesikhathi kulemikhankaso yababelwela ilungelo loluntu ngama1960s. Waba kudale lephalamende eGeorgia engakavotelwa ngomnyaka ka1971 ukuba ngumphathi wesabelo lesi.
“Engilitshela khona yikuthi isikhathi sobandlululo sesiphelile.
UCarter, owayengaziwa kangako kwezombusazwe elizweni lonke eMelika, wacina esesiba lodumo okwenza wabangumongameli ngomnyaka ka1976 kulandela ukunqoba kwakhe uGerald Ford webandla lamaRepublicans.
“Ngathi ngisiba ngumongameli kwake kwaba lempi phakathi kwamaArabs lamaIsraelis eminyakeni engamatshumi amabili lanhlanu eyedlulayo, amaGibhithe ayesekelwa ngalesos’ikhathi ngeleSoviet Union. Kwakuyilo lodwa ilizwe elelimelala lebutho leIsrael.”
UCarter waxoxisana labanye bakhe okwenza ukuba iPanama Canal ibiselwe kwelePanama njalo eleMelika lidlelane lelePeople’s Republic of China.
Kodwa kwabalenguquko ngomnyaka ka1979 kuze kube lomvukela weIslamic Revolution kweleIran okwenza umbuso wakhe ukhangelelwe phansi. Ababetshengisela kulelolizwe abohlobo lwamaShiite bagenqula uShah, owayesekelwa ngeleMelika owabaleka elizweni leli. Ababetshengisela bangena ngenkani esigodlweni seMelika eTehran bathumba izizalwane zeMelika ezingamatshumi ayisithupha lasithupha – 66. Kwathatha isikhathi eside ukuba kukhululwe abalitshumi lantathu – 13 kuphela.
NgoMabasa ngomnyaka ka1980, uCarter wavumela ukuba ibutho leMelika lihlenge abathunjiweyo.Lokhu kwehlula njalo kwabulawa ababekubutho abeMelika abayisitshiyangalombili.
Wathwala nzima uCarter ekhaya. Ukugugudeka komnotho kanye lokuncipha kwamathuba emisebenzi kwenza ukuba umnotho welizwe udonse nzima okwazondisa abantu abenengi okwadala ukuba anqotshwe nguRonald Reagan owayemele ibandla leRepublican Party kukhetho lukamomgameli. Mhlaka 20 Zibandlela ngomnyaka ka1981 uReagan engena embusweni, eleIran lakhulula ababethunjiwe. UCarter owayenqotshiwe njalo emadolonzima wabuyela esigabeni sakhe ePlains lapho asungula khona uhlelo lokuba lendawo yokulondoloza imbali – ipresidential library.
“Ngangibona engani kuzakuba yinto encane lapho engangizakuba lewofisi kanye lendawo enhle edolobheni leAtlanta.”
Kodwa akuzange kubenjalo. Yaba lesisindo okokuthi iCarter Center yabayinhlanganiso ehlolisisa ukuqhutshwa kokhetho emazweni atshiyeneyo njalo yaphinda yabangumlamlankunzi kudaba lokusetshenziswa kwezikhali zeNuclear ngeleNorth Korea kanye lokukhumisana umlotha phakathi kweleUganda leleSudan ngomnyaka ka1994. ICarter Center kuzekube namhlanje, ikhuthaza amazwe ukuba alwisane lemikhuhlane etshiyeneyo emazweni athuthukayo. Izama ngamandla wonke ukuba kunqotshwe umkhuhlane weGuinea Worm.
“Kulomkhuhlane owodwa eminyakeni engamatshumi amathathu edluleyo okwaphela du i-smallpox. Sifuna ukuba leGuinea Worm layo iphele emhlabeni wonke.”
Imisebenzi kaCarter yenza ukuba afike eOslo kweleNorway ngomnyaka ka2002 lapho aphiwa khona isicoco seNobel Peace Prize.
“Ngathi ngithola isicoco seNobel Peace Prize kwakuyimisebenzi yeCarter Center. Ngakho-ke ngiyajabula ukuba ngizakwaziwa ngemisebenzi yokukhuthaza ukuthula lokulwela ilungelo loluntu. Kambe ukhona ongeke wakuthakazelela lokhu?”
UCarter ophile waze wafika iminyaka elikhulu, wake waba lomkhuhlane wemvukuzane yekhanda ngomnyaka ka2015. Ukungaphili kahle kwenza ukuba emzini wakhe ePlains njalo wabonakala emphakathini sokulesikhathi eside engangeni empkahathini ngoLwezi ngomnyaka ka2023 ngesikhathi kungcwatshwa umkakhe uRosalynn.
“Ngifisa ukubona eleMelika elilwela ukuthula lelungelo loluntu njalo lokwabelana ezemvelo ngendlela eqondileyo, elenhlonipho. Singenza njalo sizakuba lelizwe eliqine okwedlula wonke amazwe. Yikho lokhu engikufisayo.”
UCarter uphile okwedlula bonke abake bangena eWhite House njalo umtshado wakhe loRosalynn waba yiwo owadonsa okwedlula eminye yabakhokhela ilizwe leli.
Forum