Umphathintambo wogatsha lwendaba zasekhaya omutsha kwele South Africa uthi uzakhangela zonke izinqumo ezenziwe yimithethwandaba etshiyeneyo ngodaba lwamapermit aphiwa izizalwane zeZimbabwe amaZimbabwe Exemption Permits (ZEP) ukuze athathe isinqumo esisemthethweni ngekusasa yamapermits la.
Enkulumeni eyethule emsakazweni weSouth African Broadcasting Corporation, uMnumnzana Leon Schreiber uthe usephakathi kokukhulumisana leziphathamandla zogatsha lwendaba zasekhaya ukuthola iqiniso lokuthi yini engahambanga kahle ngendlela lolugatsha olwaphatha ngayo udaba lwama ZEP.
“Akufuzanga sithathe isinqumo singacabanganga. Leli liphutha esibone lisenzakala kakhulu ekuphathweni kwaloludaba obekusenza umthethwandaba uchithe yonke imizamo yogatsha lwendaba zasekhaya. Kufanele sithathe isinqumo esilobuntu njalo esisemthethweni.”
Imizamo yokwesula amapermit eZEP ebisenziwa ngobengumphathintambo wogatsha lwendaba zasekhaya uMnumnzana Aaron Motsoaledi yonke yachithwa yimithethwandaba kugoqela lomthethwandaba wesisekelo sombuso. Umthethwanda uthi akulandelwanga indlela esemthethweni ekwenziweni kwesinqumo sokwesula amapermit la.
Umphathintambo Schreiber uthi kuqakathekile ukuthi azwisize zonke lezizinqumo zomthethwandaba engakathathi isinqumo sakhe ngaloludaba.
“Ngizahlaziya zonke izinqumo zomthethwandaba ngama ZEP. Ngemva kwalokhu ngizathola imibiko egcweleyo kuziphathamandla zogatsha lwendaba zasekhaya ezazi ngcono ngala mapermit. Ngingathola konke okwaphazamisekayo, kuzakwenza ngithole umhlahlandlela ngekusasa yala mapermit.”
Umgcinisihlalo wenhlanganiso yeZimbabwe Community in South Africa, uMnumnzana Ngqabutho Mabhena, uthi bemukela ngezandla zombili indlela umphathintambo omutsha afuna ukuphatha ngayo udaba lwamaZEP?
“Sithemba ukuthi uzakwenza kube lula ukuthi izizalwane zaseZimbabwe eziphethe lezi incwadi ziqhubeke zihleli eSouth Africa zisebenza, abanye besenza amabusiness abawenzayo njalo abanye befunda simelele ukuthi atsho ukuthi udaba lolu uzoluphatha njani.”
Kodwa-ke isizalwane sakwele South Africa njalo obona ngokuqoqwa kwenhelo zebandla lezombusazwe elisahlumayo eleSofa Sonke, uMnumnzana Freeman Bhengu, uthi abafuni kuzwa kuthiwa kulemizamo yokuvuselela amapermit eZEP.
“As iSofa Sonke sizo organizer nawo wonke ama organisations aseSouth Africa from Operation Dudula, wonke ama organisations eSouth Africa ukuthi sichallenge any extension or anything uSchreiber azama ukuyenza kuHome Affairs ukuthi a extende amaZEPs. Sizoyi challenger and sizoyichallenger ecourt.”
Ingcitshi kwezemithetho njalo eligqwetha elilwela amalungelo oluntu uMnumnzana Vusumuzi Sibanda uthi zinengi indlela ezisemthethweni umphathintambo Schreiber angazithatha ngaloludaba.
“Angakwenza okusemthethweni yikuthi aphinde avuselele la amapermit abizwa ngama ZEP ngo 2025. Lokho kuyabe kusemthethweni. Kumbe sekungaba yilokhu ukuthi anikeze ubuhlali obungapheliyo kulabo abaphethe ama ZEP uma ephela ngoba lokho ngeke kube yisinqumo esiphatha kabi amalungelo abo. Kantike uma engacabanga ukuthi awachithize amalungelo eZEP kungabi namalungelo okuhlala la ekhaya kungadingeka ukuthi anxuse bonke labo abaphethe amaZEP ukuthi babeke imibono yabo lezikhalazo zabo kuye ukuthi kungani kungafanele ukuthi awachithe amaZEP.”
Ngokwesinqumo esitshiye senziwe nguMotsoaledi ngodaba lwama ZEP, bonke abaphethe ama permit la kuzafanele bebesebefake izicelo zamanye amapermit kusiyaphela lumnyaka. Abangenzanga lokho kuzafuze babuyele ekhaya. Abafake izicelo kodwa bengakatholi impendulo, ama permit abo azaqhubeka esebenza kuze kube sekupheleni kuka 2025.
Isizalwane seZimbabwe unkosazana Nontobeko Sithole uthi kudala befake izicelo zokuya kumapermit amanye kodwa balokhu bengakatholi impendulo.
“Noma ungaze uthi uyachecker selokhu ithi bathi bona bareceiver I application yami. Asazi lokuthi wenzeni kumbe uyalinda iwaiver or you have to apply kule enye abathi isikhona. Sihleli nje manje si confused.”
Kusenjalo, uSchreiber useyichithile imibiko yamanga ebisithi wazalelwa elokitshini leBorrowdale eHarare. Uthi yena wazalelwa endaweni yePiketberg, wakhulela eKleinzee eNemaqualand esabelweni seNorthern Cape kwele South Africa.
Forum