Seluqiniswa uhlelo lokungena emankampanini kweleSouth Africa kudingwa abokuza abangelamaphepha
Uhulumende weSouth Africa ubikwa eseqinisa umkhankaso wokuzingelwa kwabasebenza kulelolizwe bengelamaphepha abanika imvumo yokwenza lokho.
Izolo iziphathamandla zogatsha lwezisebenzi, ugatsha lukahulumende wendaba zasekhaya kanye lamapholisa bebesenkampanini yeAfrican Star Pack eBronkhorstspruit eduze lePitoli lapho abathole khona ukuthi kusebenza oweZimbabwe ongumtshayeli lezizalwane zakwele China ezimbili, bonke bengalamaphepha.
Ngeviki ephelileyo kubotshwe ixuku labomantshingelane elokitshini leBedford eGoli abangelamaphepha, inengi labo kungabadabuka eZimbabwe.
Okhokhela iviyo lokuhlolwa kwamankampani kugatsha lwezemisebenzi esabelweni seGauteng, uMnumzana Michael Msiza, utshele iStudio 7 ukuthi benza lokhu ukuhlola phose vikizonke lapho ababamba abanengi abasebenza bengelamaphepha njalo babuye bajezise amankampani ephula amalungelo ezisebenzi.
“Uma kusiya lapho okwenziwa khona iconstruction noma okwakhiwa khona sithola abantu beZimbabwe labeMozambique. Kodwa uma siya lapho kumanufacturing inengi lakhona livela eMalawi.”
Ngesikhathi esifanayo elinye iviyo leziphathamandla lezi belise Johannesburg Mall enzikini yedolobho lapho ezifike zabutha khona abakwamanye amazwe abanengi abebesebenza kuzitodlwana eziphakathi kwaleyo ndawo bengelamaphepha, kwabotshwa labanye abebezothenga.
Ngomvulo owedluleyo amalunga enhlanganiso yeOperation Dudula, engafuni abokuza abalamakhono aphansi basebenze kwele South Africa, izingenele mathupha eEast Gate Mall phandle-nje kwenziki yedolobho leJohannesburg layo izingela abangelamaphepha. Obona ngezemisebenzi kule inhlanganiso, uMnumzana Sipiwe Shabangu, utshele iStudio 7 ukuthi abafuni kuzwa kuthiwa kulomuntu wokuza osebenza endaweni zokudlela ngoba izizalwane zakwele South Africa zilawo amakhono okwenza le imisebenzi.
“Abafowethu baripleswa yiwola amaforeigner. So sithi we are going to raid wonke amarestaurant so that amaSouth Africans kube yiwo asebenza kula amarestaurant.”
Ebulenjini be-internet kugcwele imifanekiso yabokuza bephuma begijima endaweni zokwakha abanye beseqa emoteni zihamba bebalekela iziphathamandla ezizingela abangelamaphepha.
Umphathintambo wogatsha lwendaba zasekhaya kwele South Africa, uMnumzana Leon Schreiber, usanda ukutshela iStudio 7 ukuthi lumkhankaso usazoqiniswa endaweni ezibalisa ezokudlela, ezokwakha, ezabalindi lezinye. Banengi kakhulu abeZimbabwe abasebenza kulez’indawo.
“Siyafisa ukuthi abantu bazosebenza kuleli kodwa abenza lokhu bengelamvumo bazabhalela ekhaya.“
Okhokhela inhlelo zabatsha kubandla elisahlumayo eleSisonke Party, uMnumzana Someleze Sigudu, uthi kuyabajabulisa kakhulu ukuqiniswa kwenhlelo zokuzingela abasebenza eMzansi bengelamaphepha.
“Ngokwenza kanje kuzonciphisa amathuba entsha engasebenzi kweleSouth Africa. Siyamgqugquzela engathi angayandisa lento afike kula amabhizimusi amakhulu, nakuconstruction bakwazi uku addressa le issue.”
Kodwa-ke isizalwane seZimbabwe, uMnumzana Trust Ndlovu, uthi akusizi ukuzingela abakwamanye amazwe bebuyiselwa kubo kungalungiswanga inhlupho ezibaxotshe emazweni abo. Uthi isibamangalisa indlela umphathintambo wogatsha lwendaba zasekhaya omutsha asephatha ngayo udaba lwabokuza abangelamaphepha.
“Wathi kumele wonke umuntu ongelamaphepha abe regularised. So sasibhekele ukuthi kuzokwenzeka lokhu. Hayike kungakenzeki lokhu sesibona sesibuyela emuva ngenkathi zobandlululo ezeapartheid ngoba kwakuyiyona indlela ebisetshenziswa ngamabhunu.”
Kunkulumo zedale lephamamende ezilokhe ziqhubeka kusukela ngeviki ephelileyo, kulamalunga ephalamende athi kufanele lusukunyelwe phezulu udaba lokungena kwabantu elizweni ngokungekho emthethweni.
Abanye babo bathi kufanele indawo ezifana lezokudlela, ezabalindi lemisebenzi yokusiza abakhi yenziwe kuphela yizizalwane zakwele South Africa. Lokhu kutsho ukuthi abangelamaphepha eMzansi basazowukhomba olotshwala.
Forum