Inhlanganiso ekhankasela ukulondolozwa kwamalungelo oluntu emhlabeni wonke jikelele eyeAmnesty International, isigodlo somela eleMelika eZimbabwe, umanyano wamazwe omhlaba oweUnited Nations, amabandla ezokholo labanye bathi akumelanga eleZimbabwe libophe mahlayana abaphikisayo labalwela ilungelo likazulu.
Imibiko le yethulwe kulabantu abedlula ikhulu abavalelwe eRemand Prison besetheswa amacala okuqoqa ukutshengisela emigwaqweni ngesikhathi somhlangano weSADC Summit kanye labatshengisela phandle komthethwandaba besola ukubotshwa kwabaphikisayo.
Abezindaba abeZimLive babika ukuba abantu abahlome ngemibhobho egoqela amaAK-47 bazame ukuthumba umkhokheli wenhlanganiso yeTrust Africa, uMnu. Briggs Bomba namuhla eHarare.
EleZimbabwe lizaphatha umhlangano weSADC Summit kusukela mhlaka 17 kunyanga yonale.
Unobhala jikelele webandla leFreedom Alliance, uMnu Nhlanhla Moses Ncube Uthi inkuthazo ye-Amnestye International lezinye ilakho ukungalalelwa.
UMnu. Kudakwashe Munsaka, okhokhela inhlanganiso edlelana lebandla leZanu-PF, eyeForever Associates Zimbabwe, uthi imithetho yelizwe kumele ilandelwe kungelani lokuthi kulabantu bemzini abezayo.
Umphathintambo wendaba zekhaya, uMnu. Ziyambi Ziyambi, uthi abantu abathi bakhahlanyezwa ngamapholisa kumele beyemangala emapholiseni njalo eleZimbabwe lingeke liyekele ukubopha abantu ngenxa yomhlangano weSADC Summit.
Forum