Uhulumende uthi imisebenzi yezemigodi yiyo engaphathisa kakhulu ukuvuselelwa komnotho welizwe ingaqutshwa kakuhle isebenzelana lezokulima.
Umsekeli kamongameli Emmerson Mnangagwa utshele umhlangano owelanga elilodwa wabakumsebenzi wezemigodi walonyaka owe Minex 2016 owenzelwe eHarare ngoLwesithathu, ukuba ezokwemba zingaqutshwa kakuhle zilosekelo oluzwayo njalo kulokusebenzelana lemisebenzi yezokulima, zilakho ukuvuselela umnotho welizwe ikakhulu kungalungiswa izinto ezidingakalayo zithengiselwa phandle kulokuthengisa ezenjiwayo zinjalo.
Unkosikazi Applania Munzwarangu umkhokheli wenhlanganiso yabemba imigodi emincane eye Small Scale Miners Association uthi balakho ukwengezelela isilinganiso sabakwembayo ikakhulu igolide bangalungiselwa inkinga abalazo.
Umsekeli kampathintambo wezemigodi umnumzana Freddy Moyo wazise lumhlangano ukuba kuqakathekile ukuba abembi abasacathulayo bephathiswe ethi sebethole imitshina evela kwele China ezanikezwa izabelo ezitshiyeneyo zelizwe ethi kodwa ibuya njengesikwelede esizamele sibuyiselwe.
Unkosikazi Munzwarangu uthi okwamanje benelisa ukwemba ama tonne ayisikhombisa egolide abakhangelela ukwengezelela kulokho lonyaka.
Umnumzana Wayne Williams wenhlanganiso ye Yagden Engineering uthi balomtshina olungele abembi abasacathulayo ikakhulu abaphatheka kwezokwembiwa kwegolide ongathuthukisa imisebenzi yabo.
UMnangagwa uthi uhulumende uyabusola kakhulu ubudwangudlwangu kwabanye abakulumsebenzi obenza ukuba ilizwe lingatholi inzuzo enhle ethi lemali okumele ize eziphaleni zelizwe ahibonwa. Kuthi leyo ethunyelwa yizizalwane ze Zimbabwe ezisemazweni, ziyisebenzela kanzima yedlula imali etholwa lilizwe emisebenzini yezemigodhi ngakhoke sokudingakala ukuba umthetho wezokwemba owe Mining Act osugugile ulungisiswe ngesiphangiphangi ukuze uphathise kuloludaba.
Lumhlangano ungenwe ngamankampani ezemigodhi emikhulu efana le Mimosa, Zimplats, Hwange Colliery labemighodi abasacathulayo.
