EleZimbabwe limanyane lamanye amazwe omhlaba ngoLwesine ekunanzeni ilanga lamalungelo oluntu iHuman Rights Day abamabandla aphikisayo besola uhulumende weZanu PF besithi uqhubeka engawahloniphi amalungelo.
Inhlanganiso ezizimeleyo, zikhokhelwa yiZimbabwe Lawyers for Human Rights leZimbabwe Human Rights NGO Forum zibe lomhlangano wokuzihlaziya udaba lwamlungelo lolu eHarare, zigxhile kusisekelo sombuso esitsha.
Amagqwetha atshengise ukukhuthala kumzabalazo wamalungelo lonyaka ebekhangelelwe ukuphiwa imivuso ekupheleni kwalumhlangano.
Inhlanganiso yeZimbabwe Peace Project ithe ukungahlonitshwa kwamalungelo kuqhubeka kusiba kubi elizweni, okungamazwi egcizelelwe yiMDC ekhokhelwa nguMnu Welshman Ncube.
Unobhala jikelele weUnited Nations uMnu Ban ki Moon uthe kungumlandu wakhe wonke umuntu emhlabeni jikelele ukuhlonipha lokuqakathekisa amalungelo oluntu.
Ingcwethi kwezombusazwe uMnu Mlamuli Nkomo uvumelane loBan.
Usola njalo uhulumende weZimbabwe esithi kuyadanisa ukuthi selokhe ilizwe lathola uzibuse uzulu uqhubeka ethwele nzima phansi kombuso kaMongameli Mugabe.
"Ukuhlonitshwa kwamalungelo oluntu ungathi akuqakathekanga eZimbabwe," kutsho uMnu Nkomo.
"Esikubongayo yikuthi uhulumende ngokwakhe nguye osolwayo kakhulu kudaba lokuhlukuluzwa kwamalungelo."
