Uhulumende uze wavuma ngoLwesithathu ukuthi ipulazi leManzou eMazowe, lapho axotsha khona abantu abahlala kulo lizaphiwa uNkosikazi Grace Mugabe.
Umphathintambo obona ngokwenzakala eMashonaland Central uMnu Martin Dinha utshele iStudio 7 ukuthi bazaqalisa ukufaka inyamazana ezigoqela indlovu lezilwane ngoLwesihlanu andubala beliphe uNkosikazi Mugabe leli pulazi.
UMnu Dinha uthi bazakwenza lokhu lanxa iHigh Court ivimbe uhulumende ngoMvulo ukuthi exotshe abantu laba ngoba engabadingelanga ezinye indawo zokuhlala.
Idale leli lithe njalo kumele kuhlaziywe kuqala kubonakale ukuthi ipulazi leli ngelikabani ngoba abantu laba besithi ngelabo njalo baliphiwa nguhumende ngo2000.
Inhlanganiso elwela ukulondolozwa kwamalungelo oluntu eyeAmnesty International income isinqumo somthethwandaba.
Kodwa uDinha uthi abantu laba bazaxotshswa lanxa kunjalo ngoba sebephiwe ezinye indawo zokuhlala.
Amagqwetha amela abantu laba athi azabuyela edale leHigh Court ngoLwesihlanu phezu kwaloludaba.
Kunjalo nje inhlanganiso yamagqwetha alwela ilungelo loluntu eyeZimbabwe Lawyers for Human Rights ithi ngokuxotsha abantu laba uhulumende wephule ilungelo labo.
Ithi njalo uhulumende uqhubeka esephula ilungelo loluntu njalo engahloniphi imithetho yelizwe.