Izakhamizi endaweni ezitshiyeneyo zelizwe zithi zicela ukuthi uhulumende aqhelise uhlelo lwakhe lokuphathisa abafuyi ngokudla kwenkomo, olwePresidential Stock Feed Program, ngoba izifuyo zabo sezisifa buthumuthumu ngenxa yendlala.
NgoLwesithathu iziphathamandla zikahulumende zabele abafuyi ukudla lokhu esigabeni seGungwe, eGwanda South.
Abantu abanengi bathi uhlelo lolu alukabafinyeleli njalo bathi uhulumende kumele aphangise ukuze benelise ukuhlenga izifuyo zabo eziseleyo ngoba ezinengi sezifile.
Uhulumende uthi esigabeni seMatabeleland South kufe inkomo ezizinkulugwane ezintathu ezilengxenye, 3,500, kunyanga ezine ezedluleyo ngendlala.
Uthi njalo kusiyaphela umnyaka elizweni lonke jikelele kulakho ukufa inkomo ezedlula izigidi ezimbili, 2,3 million.
Isakhamuzi seAvoca, eFilabusi, uMnu Sifanjani Bhebhe uthi isimo sibi kakhulu endaweni yakhe.
Forum