Idale lezisebenzi, ele Labor Court ngoLwesihlanu lilahle isicelo samatitshala esethulwa yinhlanganiso ye Progressive Teachers’ Union esokuthi uhulumende engazabiza amatitshala akukhefu.
Uhulumende ekuqaleni kwayonale inyanga wathi wonke amatitshala akukhefu kumele aphindele emsebenzini ngoba uhulumende engelamali yokubabhadala bezihlalale aphinde abhadale labayabe bephethe umsebenzi wabo bengekho.
Kodwa umkhokheli wenhlanganiso enye eyamatitshala iZIMTA, uMnu. Richard Gundane utshele iStudio Seven ukuthi bona belokhu bethembe ukuthi umthethwandaba uzalalela olwabo udaba.
"Njenge Zimbabwe Teachers' Association sithe sidinge ama lawyers njalo kulama courts abakwaziyo ukuthi indaba nxa sezinje ziphathwa njani," kutsho uGundane.
Uthi sekunjelo abasafuni ukukhuluma okunengi ngoba ababalisi balelungelo lokuya kukhefu le leave.
UGundane uthi amatitshala la abizwe emsebenzini ngoba uhulumende esithi kalamali yokubhadala izisebenzi eziyabe zibambele abakukhefu.
"Nxa sikuzwa sibona ukuthi into lezi azisaphathwanga kahle ngoba bekumele kubelenkulumo. Lathi asisakwazi ukuthi kuhamba njani sesidinge abaziyo ukuthi kuhamba njani," kutsho uGundane.
