Inhlanganiso ebona ngezokulondolozwa kwelungelo loluntu emhlabeni jikelele eye Human Rights Watch ithi uhulumende weZimbabwe kumele aphathise abantu abavelelwe yingozi yokudilikelwa yizindlu lizulu lesikhukhula lanyakenye.
Linhlanganiso yethule impumela locwaningo olumayelana lesahlakalo lesi oluthiwa Homeless, Landless and Destitute – The Plight of Zimbabwe’s Tokwe Mukosi Victims.
Lolu cwaningo lukhuthaze umanyano wamazwe womhlaba, I United Nations ukuthi uphathise abadilikelwa yizindlu ngoba uhulumende ezithathela uncedo oluyabe luphiwe abantu laba abedlula inkulungwane ezintathu, I 3000.
IHuman Rights Watch icebise umanyano wamazwe abensundu, iAfrican Union ukuthi ikhuthaze uhulumende ukuthi aphathise abafinyelelwe lizulu lesikhukhula njengalokhu okuphansi kwesivumelwano se AU esokuphathisa abawelwa yingozi ese Convention for the protection of and Assistance of Internally Displace Persons in Africa.
Omela isigaba se Tsholotsho, uNkosikazi Roselyn Sipepa Nkomo, owebandla le MDC-T, utshele uChris Gande weStudio Seven ukuthi lase sigabeni sakhe uhulumende kaphathisi.
