UMongameli Emmerson Mnangagwa usengezelele ngamalanga alitshumi lane uhlelo lokuthi abantu bakwele Zimbabwe bahlale ezindlini esithi ufuna ukuthi ilizwe lilwisane kahle lomkhuhlane weCoronavirus ngendlela efaneleyo.
UMnangagwa wethule lokhu namuhla eHarare emsakazweni weZimbabwe Broadcasting Corporation ngesikhathi likhuphuka inani labantu abalomkhuhlane lo elizweni.
UMnangagwa uthe ukungezelelwe amalanga la kwenzelwa ukuthi kuvinjwe ukumemetheka komkhuhlane weCOVID-19 osubulele abantu ababili eZimbabwe labantu abedlula inkulungwane ezilikhulu lamatshumi ayisithupha – 161,000.
Bekumele kugqitshwe kusasa uhlelo lolu.
Abantu sebelamalanga angamatshumi amabili bevalelwe ezindlini abanengi bekhonona ngokuswelakala kokudla okwenza ukuthi bahlangane labanye ezitol lapho abagudlana khona santando kungela lokhu okuthiwa yi-social distancing. Kulabanye abathi ukungezelelwa kwamalanga la kuzakwenza ukuthi babulawe yindlala.
Omunye wabo nguNkosikasi Sukoluhle Ndlovu isiphathamandla senhlanganiso yeAmalagamated Rural Teachers Union of Zimbabwe.
Lokhu kusekelwa nguNkosazana Tatenda Siziba, owebandla leLabour Economist Afrikan Democrats.
UMnu. Ostalos Gift Siziba, unobhala wabatsha kubandla leMDC elikhokhelwa nguMnu. Nelson Chamisa, laye ukhonona ngohlelo lolu.
Ingcwethi kwezempilakahle zithi kuqakathekile ukuthi abantu bengabuthani ukwenzela ukuvimba ukumemetheka komkhuhlane weCoronavirus COVID-19 owaqhamuka kwele China ngomnyaka ophelileyo.
Kulabantu abangamatshumi amabili lanhlanu abatholakala belomkhuhlane lo eZimbabwe. Ababili babhubha kuthi ababili njalo kubiwa ukuthi sebesilile. Abantu bayakhala ngokwenzekala elizweni, ikakhulu izisebenzi labaziphandela ukudla. UMnu. Joseph Tshuma webandla leZanu PF uthi okwenziwe nguMnangagwa kuzakwenza kubelukhuni kwabazisebenzayo.
UTshuma uthi uhulumende kumele ancede abantu abazisebenzayo.
UNkosazana Thabitha Khumalo, umgcinisihlalo webandla leMDC elikhokhelwa nguMnu. Nelson Chamisa, laye uyakhala ngodaba lolu.
UMnu. Believe Gaule webandla leZanu PF uthi uhulumende kumele ancedise abantu lamabhizimusi.
Kubikwa ukuthi uhulumende uzancedisa abantu ngemali yokuthenga ukudla.
Emhlabeni wonke jikelele, isibhedlela seJohns Hopkins University sibika ukuthi kulabantu abedlula izigidi ezimbili – 2,344,000 abatholakala belomkhuhlane lo.
Kwele Melika sebefika phose isigidi abalomkhuhlane lo njalo sokubhubhe abafika phose inkulungwane ezine – 39,090. Bakhona njalo abasilayo.
