Abanye abantu bayathandabuza ukusebenza kwejekiseni yeSinopharm eyokunqabela ukumemetheka kwegciwane leCOVID-19 eyanikwa eleZimbabwe ngele China loba uMongameli Emmerson Mnangagwa labanye bakhe besithi kayibulali.
UMnangagwa ukhuthaze abantu ukuba bahlatshwe ijekiseni yeSinopharm ngoMgqibelo eNational Heroes Acre ngesikhathi kungcwatshwa uRetired Deputy Commissioner Moses Griffiths Mpofu.
“Sonke okubalisa lami njengomongameli, abaphathintambo lazo zonke iziphathamandla, sizohlatshwa lel’ijekiseni. Lani lonke kumele lenze okufanayo nxa kuyikuthi sifuna ukuzilondoloza thina, izimuli zethu lesizwe sonke, ukuze impilo zethu zibuyele esimeni sakuqala, kumele sihlatshwe lelo jekiseni. Lilungile lel’ijekiseni njalo kuyindlela esebenzayo kwezokulwisana leCOVID-19 njalo kungesinye sezikhali esizisebenzisayo ukulwisana laleligciwane.”
Umsekeli wakhe, uMnu. Constantino Chiwenga, uhlatshwe ijekiseni yeSinopharm ngeviki ephelileyo lapho akhuthaze abantu ukuba benze njengaye.
Zinengi iziphathamandla zikahulumende ezikhuthaza uzulu ukuba ahlatshwe ijekiseni le elokhu ingakethulwa okusemthethweni yinhlanganiso yomhlaba wonke jikelele eyeWorld Health Organization. Kodwa abantu abanengi bathi kabasoze bahlatshwe ijekiseni le ngoba babona engani kayihluzwanga ngemfanelo. Omunye wabesaba ijekiseni yeSinopharm nguMnu. Joseph Phiri.
“Iqiniso elikhona, siyabe sifuna ukuthi sibone ibhokisi elile vaccine, livulwa, ivaccine ithelwa kusyringe sikhangele upresident ahlatshwe, abe nguye ohlatshwayo kuqala ukwenzela ukuthi ilizwe libone ukuthi le ivaccine, isafe. Okokuthi kuyasebenza, sizabona after amalanga amalutshwana nje, singabona kungela ma side effects kuyena lowo ohlatshwe kuqala, abantu bazakholwa ukuthi liyasebenza.”
UMnu. Mthandazo Ndlovu laye uthi uyayesaba ijekiseni le.
“Okusuka kuphambanise abantu yikuthi abantu baconfused ukuthi yini, yini iqiniso ngoba into leyi ma ibuya khathesi, abantu one, abakafundiswa lutho nge vaccine le.”
Uhulumende uthi kuzahlatshwa kuqala abongi, odokotela labanye abasebenza kwezempilakahle.
Kukhangelelwe ukuthi kuzathenga amajekiseni awohlobo lweSinopharm azinkulungwane ezingamakhulu ayisithupha ngeviki ezayo. Lokhu kwenzakala ngesikhathi kukhanya lisehla inani labantu abalomkhuhlane weCOVID-19 eZimbabwe.
Abantu ababili babulewe ngumkhuhlane lo izolo kwathi abafika phose amatshumi ayisithupha – 58 batholakale bele coronavirus. Sokulabantu abafika phose inkulungwane lengxenye – 1,432 asebebulewe yiCOVID-19 eZimbabwe kusukela ngoMbimbitho nyakenye.