Uhulumende weZimbabwe usanda kwethula umbiko othi uphakathi kokulungisa ugwalo olujulileyo lweziqondiso zokusebenzelana kwezizalwane zalelo lizwe ezisabalele umhlaba wonke alubiza ngokuthi yi Diaspora Policy.
Lolu gwalo luhlose ukucanda indlela yokuthuthukisa ukusebenzelana kukahulumende lezizalwane zeZimbabwe esezathuthela kwamanye amazwe ukuze zingakhohlwa lapho ezasuka khona kanye lokuthi ziphatheke ngokugcweleyo kuntuthuko yalapho ezidabuka khona.
Umnumzana Obert Mpofu umphathintambo wezokuthukisa umnotho welizwe, uthi okunye okuzaphathwa luhlangothi lwakhe kulolu gwalo yikuphuma lendlela ezilula zokuthumeza imali ekhaya kanye lokuphathisa izizalwane zeZimbabwe ezihlala kwamanye amazwe ngengwalo lamaphepha aqondileyo okuhlala emazweni la, ngokusemthethweni.
UMpofu utshele uGibbs Dube we Studio 7 ukuthi banengi abantu asebetshengise ukujabulela njalo ukulusekela uhlelo lolu.
Kodwa ke uMnumzana Daniel Molokoele igqwetha elilwe amalungelo oluntu owenhlanganiso yeZimbabwe Global Forum ukhala ngokuthi uhulumende ulakho ukubhekana lenhlupho ezithile ngoba phela kazange azihluphe ngokuqala axoxisane labo ngokusungulwa kohlelo lolu, ethi kunengi abalembuzo lakho ngalo, okumqoka kuyikuthi bona kuzabanceda ngani nanku bengavunyelwa lokuvota kukhetho bengekho elizweni.