Umongameli Xi Jinping wele China, uqhibe uhambo lwakhe lwensuku ezimbili eZimbabwe, olwamukelwe ngenjabulo enkulu ngumongameli Robert Mugabe othe luyindlela yokuqinisa ubudlelwano obukhona phakathi kwamazwe omabili kwezombusazwe kanye lezomnotho.
Ekhuluma edilini elenzelwe umkhokheli we China lo kanye lequla lakhe ngoLwesibili kusihlwa, ngemva kokulobelana izivumelwano ezimbalwa okubalisa olwemali yohlelo lokuthuthukisa isititshi esipheka amandla kagetsi ese Hwange Thermal, olubiza phose ibillion lengxenye lamadollar-$1.4 billion, uMugabe uthe kuyajabulisa lokhu okwenzakalayo ngoba usuzaqala umsebenzi.
Uthi amazwe omabili asebenzelana kunhlangothi zonke zempilo kusukela kwezokukhulumisana ngencingo, ezokulungiswa kwemithi, ezokulima, ezokwemba amatshe aligugu kanye lezokwakha.
UMugabe uthi kuyajabulisa ukuba eleChina selisebenzelana lamazwe akuqembu elikhankasela ukusebenzisa indlela zakulezinsuku ukuthuthukisa ezomnotho okufana labe Non-Aligned Movement le G77. Ethi ele Zimbabwe lisekela eleChina kwezokusebenzelana lamazwe akuzwekazi le Africa kukhangelwa uhlangothi lohlonzi kanye lokuzwisisana.
Ngaphandle kwezigidi phose ezilikhulu zamadollar-$98 million, yendleko yokuthuthukisa eHwange, iZimbabwe ithole njalo uncedo lokuthenga impahla edingakalayo ukuthuthukisa ezokukhulumisana, yohlobo lwe fiber optic, enkampanini kahulumende yencingo eye Telone.
Ezinye zezivumelwano ngezibalisa esokwakha isiphala sokulungisela lokulondoloza imithi, amahofisi amatsha edale lephalamende, ezokundiza lokulungiswa kwendizamtshina kanye losizo lwempahla ezasetshenziswa ukulondoloza inyamazana zendle.
Esinye sezakhamuzi esingathandanga ukubethwa ngegama, sithi akusizi lutho ukuletha imali kuleli nxa isimo singazange siguqulwe ngokwaneleyo, kuphathise ekuthini abaza lemali zabo bayahlaliseka.
Wathi kumele uhulumende weZimbabwe, afunde ukwehlukanisa ezombusazwe lezamabhizimisi ukuze bahugeke labo abafisa ukuzasungula amabhizimusi abo kuleli.
Ngaphandle kwalezi zivumelwano ezilotshwe ngoLwesibili, eleZimbabwe lithole njalo izigidi zamadola yezikwelede yokusebenzisa ukuthuthukisa inhlelo ezimbalwa okubalisa olokuqhelisa I Kariba South power station, ukuthuthukiswa kwezokutholisa uzulu amanzi ahlanzekileyo kanye lokuqheliswa kwegceke lendizamtshina ye Victoria Falls International Airport.
Uhulumende weZimbabwe ubonge abe China ngokumnika uncedo lwemali yokusebenzisa ngesikhathi amazwe entshonalanga ebekela inkokheli yeZanu PF lamankampani kahulumende, izijeziso zomntotho.
Esuka eZimbabwe uJinping ulubhekise kwele South Africa lapho abikwa esefikile sikhulumanje ekhangelelwe ukungena umhlangano we Africa – China Co-operation Forum, njalo uMugabe akhangelele ukuyawungena laye.