Umhlangano ophathelane lomsebenzi wamanzi lamandla kagetsi, owe Water Energy Climate Industry Nexus- WASHen ungene kulanga lesibili, edolobheni lakoBulawayo ngoLwesihlanu.
Lumhlangano wenzelwe emagumeni aweZimbabwe International Trade Fair, lapho izakhamizi ezibe lethuba lokukhulumisana labekhansili ngomsebenzi wokutholiswa amanzi ahlanzekileyo kanye lenhlelo zabo ezigoqela ukubuthwa kwezibi.
UManjinela wedolobho lakoBulawayo, uMnu Simela Dube uchasise kabanzi ngenhlelo abalazo emizameni yokutholisa uzulu amanzi ahlanzekileyo ngemva kokuthola uncedo lwemali ngabebhanga leAfrican Development Bank. '
''Sithole i$37 million esuka kuhulumende sisekelwa libhanga leAfrica Development Bank ukuze silunise impompi zethu ezimpompa amanzi zisuka edamu leNcema kanye lokulungisa impompi lendawo ezithwala amanzi engcekeza endaweni ezimbalwa edolobheni lakoBulawayo.''
Obambele uMayor wakoBulawayo, uNkosikazi Lilian Mlilo uthi umhlangano uhambe kuhle njalo bazasebenza gadalala ekutholiseni uBulawayo amanzi ahlanzekileyo.
''Uhambe kuhle umhlangano ngoba izakhmizi zitshengise ukuthi ziyamthanda uBulawayo. Sizasebenza gadalala ekutholiseni abantu amanzi ahlanzekileyo.''
UMphathintambo wedolobho lakoBulawayo uNkosikazi Judith Ncube ubuke ubudlelwano obukhona phakathi kweKhansili leZakhamizi.
''Luhlelo oluhle okumele okumele siqhubeke sihamba ngalo njengedolobho izakhamizi ukuze labo babelesitsho bazenzele, ngibona anathi kuhambe kuhle kakhulu lamhlanje.''
UMcginisihlalo weBulawayo Proressive Residents Association, uMnu Ben Moyo uthi ikhansili isiqale ubudlelwano obuhle lezakhamizi.
''Umhlangano wethu ubemuhle kakhulu lamhlanje siqalile ukuba sizwane, ubudlelwano obuhle phakathi kwethu lekhansili lohulumende, kuzakwenza ukuba siqhubekele phambili sisakha idolobho.''
Isikhulumi seZimbabwe International Trade Fair, uNkosazana Stella Nkomo uthi ikhansili yedolobho lakoBulawayo ithethe njalo isicoco salonyaka sombukiso weWASHEN 2019.
''Umhlangano walamhlanje esiwuqoqe lekhansili ubulabantu abedlula ikhulu njalo ubuhlafuna udaba lokuthuthukisa uBulawayo. Bekulombukiso njalo weWASHen 2019 lapho ikhansili ethethe khona isicoco saphezulu seWASHen 2019.''
Umbukiso walonyaka oweWASHEN 2019 wenziwe ngosekelo lwemali evele ebhanga leInfrastructure Development Bank of Zimbabwe, ugatsha lwezokulima, abenhlanganiso eyeUnited Nations Development Programs le African Development Bank ngenjongo yokuthuthukisa umsebenzi wokutholakala kwamanzi lamandla kagetsi awelanga. Ungenwe ngosomabhizimusi, abamakhansili, iziphathamandla zikahulumende ezisuka kungatsha ezehlukeneyo kanye lozulu.
