Intathelizindaba uMnu Itai Dzamara legqwetha lakhe uMnu Kennedy Masiye abalaliswe esibhedlela seAvenues ngoLwesine eHarare kulandela ukutshaywa kwabo ngamapholisa balele esibhedlela njalo ngoLwesihlanu.
Ababili laba batshaywe baqaleka njalo uMasiye wephuke ingalo kwathi uDzamara laye walimala kakubi emzimbeni wonke.
UDzamara uhlaselwe ngamapholisa ephakathi kokutshengisela labanye bakhe abalitshumi besola umbuso kaMongameli Mugabe. UMasiye utshaywe ezama ukukhulumisana lamapholisa njengegqwetha ngaloludaba.
UMnu Dzamara utshele iStudio 7 ukuthi lanxa esebuhlungwini, inhlolisiso enziwe ngodokotela iveze ukuthi ubengalimalanga ngaphakathi, okuyinto ebisesatshelwa ngodokotela kulandela ukuqaleka kwakhe.
UMasiye laye uthe usebuhlungwini obukhulu. Usole njalo amapholisa wathi uzathatha amanyathelo emthethweni ngokutshaywa kwakhe.
Sixhume isiphathamandla seWoza uNkosazana Magodonga Mahlangu, yena oseke watshaywa ngamapholisa etshengisela.
