Izakhamizi zedolobho le Chitungwiza zithi zidlela evalweni kulandela ukuqhamuka kodlakela lwezombusazwe lapho amalunga ebandla le Zanu PF esesuselanga amanqe.
Kodwa amapholisa Alandula ukuthi ababili abathi uLloyd Jambawu, obengumsekeli kamgcinisihlalo wabatsha eChitungwiza lo Marko Masenda obengukhomisari abaganyulwe ngehloko ngu Proud Mupambwa ngoMgqibelo eChitungwiza, babulewe kubangwa ezombusazwe.
Namhla ekuseni, uMupambwa utholakale efile amapholisa athi uzibulele. Kodwa izakhamizi zithi kumgceke ukuthi lokhu kugamulana lokulwisana okuqhamuke izolo kulezombusazwe.
Omunye wababone lesi siga sisenzakala utshele iphephandaba le Newsday ukuthi uMupambwa ubecele ihloka kuye esithi ufuna ukugamula inkuni ukuze apheke itiye.
"Ngizwe egamula isikhuni ebesiphandle kathathu wabengena endlini wasukela uMasenda wamgamula, wathi esezama ukugamula uJambawu wabaleka waze wayamthola bucwadlana wamgamula," kutsho lumama.
Loludlakela luqale eHarare kumaviki amabili njalo lukhanya seluqhela endaweni zelizwe ezinengi.
Umkhokheli wenhlanganiso yezakhamizi eye Chitungwiza Progressive Residents’ Association, uMnu. Admire Zaya utshele umsakazo weStudio 7 ukuthi abantu sebesesaba ukuthi abasekeli bebandla leZanu PF bAZAKUTHI bengaqeda ukulwisana bazangenela uzulu mathupha.
"Nxa besithi akula ezombusazwe ekulwisaneni lokhu phakathi kwebandla baqamba amanga ngoba abantu be Zanu PF kusobala ukuthi sebesukelana bona bodwa," kutsho uZaya.
