Umthethwandaba weConstitutional Court ubeke eceleni, isinqumo phezu kodaba olukhwezwe ngumqondisi we Heal Zimbabwe, umnumzana Rashid Mahiya elomnumzana Hilton Chironga, befuna ubambe ngamandla uhulumende ukuthi aphume lendlela uzulu angazisebenzisa ukukhalaza lapho ilungelo lakhe lephulwe ngabezomvikela ngokumhlukumeza.
UMahluli, uJustice Luke Malaba uphe lesi sinqumo, ngemva kokuba elalele okwethulwa ngamagqwetha ababili laba.
Umnumzana Tendai Biti obebamele, uthi bakhweze loludaba bafuna umphathintambo wezemithetho, onguye njalo umsekeli kamongameli, umnumzana Emmerson Munangagwa, akhokhele ekuguqulweni kwalomthetho kunyanga ezintathu ezilandelayo njengoba sesiside isikhathi kungalandelwanga okumunyethwe yisisekelo sombuso welizwe.
Iminyaka simithathu isisekelo sombuso sethulwa kodwa abezomvikela laba ababalisa amapholisa, amasotsha, abasebenza ukulondoloza izibotshwa emajele kanye labasebenza becatshile abe CIO bengasilandeli.
Kodwa igqwetha likahulumende, unkosikazi Fortune Chingwaru,yena uthi asikho isizatho sokulukhweza edale laphezulu loludaba, njengoba sewaqala umsebenzi wokukwenze lokho lanxa engasacacanga ukuba uqale nini njalo usukusibanga siphi lowo msebenzi.
Abaze ukuzakuzwa loludaba, abevele enhlanganisweni ezizimeleyo, batshengise ukukhathazeka ukuba uhulumende akazihluphi, ukusilandela isisekelo sombuso, lanxa sikubeka sobala ukuba nguye olomlandu phansi kuka Section 210, wesisekelo sombuso, ukuba enze zibe khona indlela ezizophathisa ukudingisisa lapho uzulu ekhalaze phezu kwesiphatho sabezomvikela.
Omunye wabatheke kwezokukhankasela ukulondolozwa kwelungelo loluntu, umnumzana Pride Mukono, usole lobu buqholo obuvezwe nguhulumende, engafuni ukusihlonipha isisekelo sombuso esikhona, esalotshwa ngokubonisana lozulu.
Umnumzana Mahiya we Heal Zimbabwe, uthi bakubone kufanele bathathe lelinyathelo ukusa loludaba kulelidale laphezulu, ngoba uhulumende kungekho akwenzayo ukubeka lowomthetho njengokumunyethwe yisisekelo sombuso, osekusenza zande izehlakalo zokuhlukuluzwa mhlayana kukazulu ngabezombikela laba.
Kuthi umnumzana Hilton Chironga ethi ekubone kufanele alukhweze edale ngemva kokuhlukuluzwa komfowabo ngomnyaka ka 2008 ngabezomvikela lamapholisa laba,k ungekho osekuthe kwenziwa ngabezomthetho lanxa lwamangalwa loludaba.
Kungalesi sizatho ababili laba, bephathiswa ngamagqwetha befuna idale linqume ukuthi uhulumende azibeke indlela ezizokwenza uzulu anelise ukuzibika lezindaba kungekho kwesaba, kuphathiswe ekuthini kuvinjwe ukuhlukuluzwa mahlayana kwabantu ngoba abezomvikela laba bezakwesaba.
Bathi bafuna lalabo abazakhethwa ukuqhuba lumsebenzi kube ngabantu abazimeleyo hatshi amalunga alembali yokuba kunhlangothi zezomvikela lezi.