Ucwaningo lokucwayisisa ukhetho lwamakhansili luveze ukuthi uzulu ufuna ukhetho lukaMongameli lamalunga edale lephalamende lwehlukaniswe lolwabo khansila ngoba inhlelo zentuthuko zisalele emuva kakhulu ngenxa yokungananzwa kakhulu kokhetho lwabokhansila okucina kusenza ukuthi kukhethwe okhansila abangazi ukuqhuba umsebenzi.
Ucwaningo lolu olwenziwe zinhlanganiso ezizimeleyo olubizwa kuthiwe yiLocal Government Elections Survey Report: The Uncertainty of 2018 lwenzelwe ukuthi kuhluzwe indlela ezingenza amakhansili labo mansipala benze imsebenzi ethuthukisa izigaba kukhangelisiswa njalo ukuthi ukhetho lwabokhansila lungatshintshwa njani ukuze inhlelo zentuthuko zenziwe ngendlela eqondileyo.
Ngokunjalo ucwaningo lolu luveza ukuthi amabandla ezombusazwe afaka abantu nje abalodumo bengacwayisisanga ukuthi bayenelisa ukuqhuba umsebenzi ngakho bakhuthazwa ukuthi baqale bahluzisise abantu phakathi kwamabandla abo kukhangelwa ulwazi kanye lokwethembeka kwabo phambilini kokuthi bamele uzulu.
Okhokhele ukwenziwa kocwaningo lolu uDr Davison Muchadenyika uchaza lokho.
UMuchadenyika uthi abantu abangaphezu kwesilinganiso esifika phose okungamatshumi amahlanu ekhulwini, i 47%, bathi omeya abaqhubi msebenzi kuhle ngoba abala mandla okwenza umsebenzi ngakho bafuna ukuthi omeya babiselwe ukuthi basebenze ngendlela ababesebenza ngayo kudala
Okunye okuvezwe luphenyo lolu yikuthi ukhetho alusoze lubeqhotho ngoba, abayisilinganiso esedlula okungamatshumi ayisithupha ekhulwini, i 65% abathembi inhlanganiso ebona ngezo khetho iZEC ngakho kumele iguqule iindlela esebenza ngayo ukuze abantu bayithembe.
Isakhamuzi sako Bulawayo esibale ucwaningo lolu uNkosikazi Makaziwe Ncube uthi uvumelana lempumela yalo ngoba ngempela abantu abakhangelisisi ukuthi bakhetha njani okhansila ngenxa yokuthi nxa kuhlanganisiwe uzulu usuka athatheke ngokukhetha umongameli ekhohlwa ngalokho okumthinta kakhulu okwabokhansila.
Osebenza lenhlanganiso ezizimeleyo enye yalezo ephatheke ekwenzingweni ucwaningo lolu umnumzana Emmanuel Ndlovu uthe ucwaningo lolu balwenze ngemva kokunanzelela ukuthi okhansila abakhethwa ngendlela eqondileyo ngakho kucinakufakwa abantu abayizehluleki ethi njalo balwenzele ukukhuthaza amabandla ezombangazwe ukuthi bakhethe abantu abazakhokhela ngendlela eqondileyo.
Ucwaningo lolu lwenziwe emadolobheni ayisithupha eZimbabwe agoqela iBulawayo, iHarare, IGweru, Masvingo, Mutare, le Chitungwiza.
