NgoMvulo uBulawayo ubenanza ilanga lamaqhawe lamaqhawekazi, azinikela impilo esiyalwela inkululeko yeZimbabwe, ele Heroes Day, endaweni lapho ababekwa khona esigabeni, eBulawayo Nkulumane Provincial Heroes Acre.
Inkulungwane lenkulungwane zabantu bezithe gwaqa zinikeza inhlonipho amaqhawe abhubhayo lasaphilayo ngemiculo lokubeka amaluba emathuneni.
Usibalukhu engumphathintambo wendaba zakoBulawayo, uNkosikazi Judith Ncube nguye obale amazwi kamongameli Emmerson Mnangagwa ochasise ngokuqakatheka kwalelilanga.
“Ilanga lalamuhla liqakathekile lisibonisa ukuqakatheka kokulwela ilizwe, sibonga labomama abaphuma ijumo bayalwela ilizwe bangadeli abaqhubekele phambili ngoba okwamanje silwa lokunengi okubalisa ubuyanga lokunye okuhlukeneyo.”
UMlweli wenkululeko uMnu Tshinga Dube ukhuluma ngokuqakatheka kwelanga leHeroes Day.
"Ilanga lalamuhla liqakatheke kakhulu njengabantu beZimbabwe loBulawayo amaqhawe ethu asebenza ukukhulula leli lizwe sithi labasakhulayo ngabe balibamba ngokweqiniso. Banengi abasala eaneni kufuze sibakhumbule ngaleli langa."
Ilunga ledale lePhalamende uSenator Molly Ndlovu ukhuluma ngombuthano wanamhlanje.
"Lamuhla sibuthene lapha ngabafowethu abalele lapha bayinxenye yethu bazinikelaekukhululekeni esikuthola lapha savumelana sisempiniukuba sizakhumbulana ngemisebenzi lekuphileni kwethhu. Thina esisaphila kungumlandu wethu ukuba sibakhumbule.''
UMlweli wenkulu uMnu Sijabuliso Dabengwa uthi ilanga lalamuhla liqakathekile.
''Ilanga lalamuhla liqakathekele ngoba sikhumbula amaqhawe alwela ilizwe lethu ukuba sikhululeke.''
UMweli wenkululeko owalwa impi ekuviyo leZPRA uMnu Andrew Ndlovu uthi balwa ukulwa okuhle sebetshiyele abasakhulayo indima eseleyo.
''Thina esikujabulelayo njengabalweli benkululeko yikuthi salwa ukulwa okuhle njalo asisolilutho nomsebenzi esawenzayo sesitshiyeleabasakhuluayo nokuthuthukisa ezomnotho welizwe thina okwethu sesaqeda.''
Ilunga lebandla elibusayo uMnu Elphas Mashava uvumelane loNdlovu ethi ilanga lalamuhla lamaqhawe liqakathekile.
''Ilanga lalamuhla liqakathekile kuzulu wonke ezweni ngoba laletha inkluleko kuye wonke umuntu sizokhumbula abafowethu, omalume abazali okhulu kwabanye abalwela ilizwe leli ukuba sibelenkululeko ngomnyaka ka1980.''
Imuli zamaqhawe lamaqhawekazi ebezize eBulawayo Nkulumane Heroes Acre lamhlanje zifake amaluba emathuneni ezihlobo zabo kuthi umphathintambo wakoBulawayo, uNkosikazi Ncube laye ufake amaluba engcwabeni lamaqhawe angaziwayo lapho alele khona, kunye lamapholisa, abalweli benkululeko labebutho labo bafakile amaluba.
