Izakhamizi zedolobho lakoBulawayo zidla amahabula ngokukhuphulwa okwenziwe umthelo wamandla kagetsi ngesilinganiso senxenye yekhulu-50%, ngabenkampani yeZesa kusukela ngoLwesithathu.
Phezu kokukhuphulwa komthelo wamandla kagetsi abantu bakhala ngokuthi bavele bephila nzima ngoba intengo yempahla yonke yokusebenzisa layo iqhubeka iqansa mahlayana ngasikhathi sinye iholo labo liqhubeka lincipha nxa liqathaniswa lendleko okumele zibhadalelwe ngenyanga njengemuli.
UNkosikazi Jane Ndebele isakhamuzi sePumula South, koBulawayo, ngomunye wabakhala ngokukhuphulwa komthelo wamandla kagetsi.
“Lokhu okukuqansa kwagesti kusiphatha nzima iholo aliqansanga sibhekane lobunzima uhulumende ngabe uyasizwela sigcine intandane siyehluleka ukutheka ukudla pho eyamagesti siyayithathaphi lokhu kunzima sibili.”
Esinye njalo isakhamuzi sakoBulawayo uNkosikazi Nomazwe Ngwenya uthi indaba yokuqansa kwamandla kagetsi iyamhlukumeza.
“Indaba yokukhwela kwamagesti yasihlukumeza kunje sipheka ngomlilo asazi ukuthi sophilanjani. Imisebenzi ayikho kunzima elizweni, imiholo ayikhuphuki. Okokuqala sihlal emnyameni ngoba avele esidulela asisazi ukuthi siyophila njani.”
Umcebisi kwezemikhankaso enhlanganisweni yamalungelo abathengi eyeNational Consumer Rights Association, uMnu Effie Ncube uthi lokhu kuzabangela ukukhuphulwa kwentengo yento yonke edingakala empilweni.
“Ukukhwela kwentengo yamandla kagesti kuzakwenza ukuba yonke into eyenziwa ngamandla kagesti iqanse. Impuphu, itshukela, amahlamvu lesepa kuzaqansa kudule kwenze impilo ibenzima ebantwini abavele bebuswa nzima. Impilo izakuya ibenzima ngamandla kunsuku ezilandelayo begalule ebuyangeni abaqale ukubhekana labo ngomnyaka ka1980.”
Embikweni owethulwe ngabeZimbabwe Electricity Distribution Company bathi linkampani kayephulanga lungelo labathengi ngokukhweza umthelo ngoba ilandela isivumelwano abasenze lohulumende ngomnyaka odluleyo sokukhuphula amandla kagetsi ngezigaba.
Amandla kagetsi angaba ysilinganiso se50Units asezabiza amatshumi amathathu lasikhombisa amadollar- $37, kuthi amakhulu amabili amaunits-200 units, aseyabiza amakhulu edlula amabili amadola- $243, amakhulu amathathu ama units-300 units wona aseyabiza amadola edlula amakhulu amathathu- $ 1 323.
Le yintengo uzulu athi ikhuphuke ngesilinganiso esikhulu kakhulu njalo esingeneliswa ngabanengi ngakhoke abantu bazabanjwa ngamandla ukuhlala bengela ugetsi okwesikhathi eside.
