Ikhansili yakoBulawayo ibhekane lodubo lokungabuthwa kwezibi ngesikhathi kulandela ukuphela kokusebenza kwesivumelwano esenziwa lenkampani eyayiqhuba lumsebenzi eye Waste Management Services eseyahamba lemota zayo.
Ikhansili ibiphathelwa lumsebenzi yinkampani le ebilemota zayo ezingamatshumi amabili lanhlanu – 25, ethe ngemva kokuqunywa kwesivumelwano lekhansili lonyaka yatshiya kuphela imota ezinhlanu eziyizo zekhansili.
Uhlangothi lwempilakahle ekhansilini luthi ikhansili isithwele nzima ukuthi ibuthe izibi kanye kumaviki amabili ngenxa yokusilela kwemota osokutshiye izisebenzi zekhansili zisebenza lize libe bantubahle zizama ukuqeda umsebenzi.
Ukungabuthwa kwezibi lokhu sokubangele ukuthi inengi lezakhamizi lilahle izibi egangeni osokugcwalise ingcekeza indawana yonke.
UNkosikazi Mayibongwe Ntuli, oyisakhamuzi, uthi ukungabuthwa kwezibi kuyingozi ikakhulu ngesikhathi sekhefu lekhisimsi lapho imuli ezinengi ziba lezibi ezinengi ngenxa yemicimbicimbi ehlukeneyo yokunanza lelikhefu.
Uqhubeke esithi ukuna kwezulu kweza amanzi akhukhule ingcekeza eyabe iphongulahlwa igcwale indawana yonke okuyingozi.
Wengeze esithi lesisikhathi sidinga ukuthi ikhansili yengeze izikhathi zokubutha izibi hatshi ukuphungula. Uthi ikhansili kumele izame eminye imizamo ngesikhathi lesi sekhisimusi ngoba indawo ezinengi sezenyanyeka sebecabanga ukuthi kuzaqhamuka imikhuhlane ngoba ezitaladeni akusahambeki.
Okhangela ngokuhanjiswa kwembiko ekhansilini, uNkosikazi Nesisa Mpofu, uthi ikhansili ijonge ukuthi ezinkinin yedolobho kubuthwe izibi nsuku zonke, kundawo ezilezibi ezinengi zibuthwe maviki wonke kuthi amanye amalokitshi kanye kumaviki amabili kodwa ngenxa yokusilela kwezimota kanye lemali yokudinga ezinye lokhu kuyehlula.
UNkosikazi Cynthia Zulu, ohlala eMakokoba, uthi kuqakathekile ukuthi izakhamizi labo zihlanzeke lapho zinanzelela ukuthi ikhansili ayenelisi kubutha izibi maviki wonke.
Uthi umuzi weMakokoba ungabe uminyene kodwa abahlala kulindawo yibo abenza kungahlaleki ngenxa yobutshapha lokulahlela ingcekeza indawana yonke nje bona besazi ukuthi ikhansili ayenelisi ukuzabutha izibi njalonje.
Uthi ingcekeza igcwele indawana yonke nje osokubize lemiyane ngakho kudingeka ukuthi izakhamizi zizinikele ekuhlanzeni lindawo lapho ikhanisli isalungisa inhlelo zayo zokubutha izibi ngemfanelo.
Kusenjalo, ikhansili yakoBulawayo isithole imvumo kuhulumende ukuthi iboleke imali ebhanga amadola alitshumi lambili ezigidi - $12 million, ukulungisa impompi zokuhambisa ingcekeza. Ngaphandle kokuthwala nzima ukubutha izibi, ikhansili ibhekane lohlupho lwempompi zokuhambisa ingcekeza esezigugile esezitshona zidabuka njalonje.