Abantu abambalwa balimele kakubi bathwalelwa emakilinika lezibhedlela zakoBulawayo ngemva kokuqhamuka kokulwisana phakathi kwabezomvikela labakade betshengisela besola isimo esiselizweni.
Obona ngezempilakahle kazulu esibhedlela seMpilo Central Hospital uDokotela Solwayo Ngwenya uchasise kabanzi ngesimo esisesibhedlela lesi ekhuthaza abantu ukuthi batshengisele ngokuthula bengabi lodlame.
UNkosikazi Jessica Ndlovu ohlala elokitshini leTshabalala koBulawayo uveza isimanga esenzakale ekilinika yeTshabalala lapho amapholisa athele intuthu ehitshaya yaze yavalwa ikilinika.
Evumelana loNkosikazi Ndlovu, uNkosikazi Agnes Kayanda uthi wehlulekile ukwelatshwa ngoba ikilinika ivaliwe ngeziphithiphithi zomsindo obusedolobheni.UMnu Mcedisi Mavuso Tshabalala weJohhana Mafuyane elokitshini leMaphisa eKezi uchaza ukuba kubi kwezempilakahle eMaphisa kanye lokudubeka kwabantu ngenxa yokuvalwa kwelizwe nguzulu.
“Ukuvalwa kwelizwe kuqhubekela phambili edolobheni lakoBulawayo isibhamu sikhala njalo nje elokitshini leNkulumane, eTshabalala leSizinda osekulemibiko yokulimala, ukubotshwa lokufa kwabantu lobanje uhulumende engakatsho ukuba isimo siminjani uma kulandelwa umthetho.”
Abamele bathenge imithi lamaphilisi kumavinkili azimeleyo ama pharmacy edolobheni lako Bulawayo kube nzima kibo ngoba wonke vele evaliwe okulakho ukudala ubunzima kuzigulane ngoba izibhedlela zikahulumende azilamithi inengi liphephela kumavinkili lawo.
