Indodakazi kamongameli uBona Mugabe, ubikwa esethumbe iphulazi lomunye umlimi omhlophe emangweni wako Bhora esiqintini se Goromonzi ele Divonia, osokwenze lumlimi engasela ndawo yokuhlala.
Ekufikeni kwentathelizindaba yeStudio 7 ephulazini leli umnikazi walo owazakala ngegama lokuthi ngumnuzama Hunter, ubikwa ebonakale ehlukumezekile ethutha impahla yakhe yokulimisa efana lamathalakitha, amakhuba lokunye ukuze kusiwe eHarare.
Amapholisa, amasotsha kanye lensoli babikwa bebekhona ngaleso sikhathi njalo balise intathelizindaba ukuthi zingene zikhulume labantu okugoqela yena uHunter lezisebenzi zakhe.
Kodwa omunye umlimi ongumakhelwane kodwa ongathanda ukuvezwa igama lakhe utshele intathelizindaba ukuthi esinye isiphathamandla sebutho obe bizwa ngokuthi ngu Colonel Nkatazo nguye obuye esazisa uHunter ukuthi kumele asuke kulelo phulazi njengoba selilomnikazi omutsha onguBona Mugabe.
Izisebenzi zika Hunter ezikade zimncedisa ukuphakitsha impahla yakhe zifakwa emotheni yokuthwala zibe zibonakala zincifa lokunyikinya amakhanda zisola okwenzakalayo njengoba bezingavunyezwa ukukhuluma lentathelizindaba. Ezenelisa ukunyenyeza bezikhala ngokuthi azisakwazi ukuthi elakusasa lazo lizoba njani njengoba bezihlalisene kakuhle lomqatshi uHunter.
Ukuthunjwa okwenziwe iphulazi leDivonia yindodakazi kamongameli welizwe kubikwa sokusitsho ukuba imhuli yonke kaMugabe lokhe isengezelela inani lamaphulazi esilithumbileyo lokhe lolu hlelo lokwabela abensundu amaphulazi lwasungulwayo ngoba lonina uGrace Mugabe ngakwelinye icele use thumbe amaphulazi amanengi labanye abantwana abangabafana. Lokhu kwenzakala lalobanje umongameli Mugabe ngokwakhe ehlala ekhuza abanye abebandla lakhe leZanu PF batshiyane lokuthumba amaphulazi.
IStudio 7 kayenelisanga ukukhuluma lendodakazi kaMugabe ukuze sizwe ukuthi yena uthumba leki phulazi ngaliphi.
Kodwa inhlanganiso yabalimi bamaphulazi amakhulu eye Commercial Farmers Union, isole kakhulu ukuthunjwa kwaleli phulazi kanye lamanye alokhu eqhubeka ethunjwa ngabebandla leZanu PF isithi lokhu yikwephulwa kwelungelo loluntu
Ithi linhlanganiso lokhu akusoze kwaphakathisa inthuthuko yenotho yelizwe nxa ilizwe lingaqhubeka lokhe lisiba lesimo esibi kangaka sokwephula ilungelo loluntu ikakhulu lapho ilizwe licela uncedo lwemali kwamanye amazwe.
Ingcwethi zezenotho zibika ukuthi umnotho welizwe uqhale ukuntengantenga ngesikhathi kuhluthunelwa abamhlophe amaphulazi ephiwa abensundu inengi labo kungabe Zanu PF abangazange bawasebenzisa ukulimela ilizwe ukudla okwaneleyo njengalokho obekusenziwa ngabamhlophe.