UBiden Wethekelela kweleAngola Kuhambo Lwakhe Lwakuqala eAfrica enguMongameli weMelika

UMongameli weMelika uMnu Joe Biden, ophakathi kokwethekelela kweleAngola, uhlangane losowabo walelolizwe uMnu Joao Lourenco ngoLwesibili bekhulumisana ngendaba ezigoqela ubudlelwano bokuthengiselana phakathi kwamazwe aseAfrica leMelika kanye lezomvikela.

Ababili laba bakhulumisane njalo ngohlelo lokwakha injanji yesitimela esuka kweleDRC isiya eZambia laseAngola, eyeLobito Railway, okuluhlelo oluphathiswa ngengemali nguhulumende weMelika.

Lolu luhambo lukaBiden lwakuqala eAfrica njalo luza ngesikhathi eselungiselela ukusuka esikhundleni ededela uMongameli omutsha uMnu Donald Trump ngoZibandlela.

Ekhuluma lentathelizindaba namuhla uBiden uthe uyaziqhenya ngokuba nguMongameli wakuqala wakweleMelika ukwethekelela kweleAngola.

Wengeze wathi eleMelika lizimisele ukusebenza lamazwe eAfrica liwaxhasa kunhlelo ezitshiyeneyo.

UBiden uthe njalo uzakhulumisana ngodaba lombuso wentando kazulu loMongameli Lourenco, yena athi uyazama ukuwugxilisa kweleAngola lanxa abanye besithi awukho umbuso okhululekileyo kulelolizwe.

Uhambo lukaBiden luza ngesikhathi eleMelika liphakathi kokuncintisana leleChina kanye lelRussia ekuzisondezeni emazweni aseAfrica.

Olandela ezombusazwe zeMelika uMnu Tim Muringai utshele iStudio 7 ukuthi lubaluleke kakhulu uhambo lukaBiden lanxa kwakudingeka ukuthi ethekelele izwekazi leAfrica ekuqaleni kombuso wakhe, hatshi khathesi esephula esihlalweni.

Embed share

Ingxoxo loMnu Tim Muringai

by VOA

Embed share

The code has been copied to your clipboard.

The URL has been copied to your clipboard

---

No media source currently available

0:00 0:03:56 0:00

Lapho esitholakala khona

• 16 kbps | MP3
• 32 kbps | MP3
• 48 kbps | MP3

Ukudlala