Akubizwa ozwayo edolobheni leDallas, esigabeni seTexas, eMelika lapho okulemicimbi emikhulu emibili, ebuthanisa inzalo yaseZimbabwe asihlala kweleMelika.
Inengi lamaZimbabwe lizakuthi gwaqa eDallas ngalimpelaviki kusukela NgoLwesihlanu mhlaka 03 Mpandula kusiya ngeSonto mhlaka 5 Mpandula embukisweni wezamabhizimusi oweZimExpo abamanyane lonyaka labenhlanganiso yamakholwa esiKristu, eye Christian Fellowship International-CFI labo abalomhlangano wabo womnyaka edolobheni linye.
Abenhlanganiso lezi zombili banxuse abeZimbabwe abasezigabeni ezitshiyeneyo zeMelika, osomabhizimusi abaseMelika labavele ekhaya, abafundisi, abaculi labanye. Abazolibazisa uzulu waseZimbabwe abaculi bagoqela uBaba Mechanic Manyeruke, uTorky Vibes, Mfundisi Chivaviro, Mercy Mutsvene, Mupositori Wency, Wellington Kwenda, Chelsea Mguni labanye.
Umsakazo weStudio 7 ube lethuba lokuxoxa loBaba Manyeruke oze ukuzocula emikhosini yomibili evela eZimbabwe.
