Umongameli Robert Mugabe usexotshe umsebenzi umpathintambo wakhe obebona ngezemidlalo umnumzana Andrew Langa ngoba esetheswa umlandu wokuba ngomunye wabakucele leZanu PF elikhokhelwa nguNkosikazi Joice Mujuru owayengumsekeli kamongameli. Isikhundla sikaLanga sesinikwe owayeyintathelizindaba uMakhosini Hlongwane.
Lokhu kuphume embikweni olotshwe ngunobhala omkhulu ehofisini kamongameli ledale labampathintambo ele Cabinet, umnumzana Misheck Sibanda, ohle wachasisa ukuthi uhlangothi lwezamasiko obe luphansi kwalolu gatsha solusiya kugatsha lwentuthuko yemaphandleni lokulondolozwa kwamasiko.
Belivele selidumela emasumpeni ngemva kokuxotshwa kwakhe uLanga ukuba ngumgcinisihlalo wesabelo seMatebeleland South ekuxotshweni okwenziwe ixuku leziphathamandla zeZanu PF ezisekela unkosikazi Mujuru ekuqaliseni komnyaka.
Kunjalo nje, owake waba ngumpathintambo wezemfundo njalo eyisiphathamandla seZanu PF umnumzana Sikhanyiso Ndlovu obhubhe ngoMgqibelo koBulawayo ngemva kokutshaywa yistroke usenikwe inhlonipho yeqawe lesizwe njalo ukhangelelwe ukuyabekwa emathuneni abekwa maqawe awe Heroes Acre ngoMgqibelo.
Inhlanganiso zezindaba zikahulumende zibika ukuba isidumbu sikamuyi obhubhe eseleminyaka engamatshumi ayisikhombisa lathobaminwe mbili-78 sizasuka koBulawayo kusasa sisiwa eHarare ngemva komthandazo wesikhumbuzo eBulawayo
Amphitheatre andubana ayebekwa.