Ummeli wakweleMelika eZimbabwe, umnumzana Bruce Wharton uthi ikusasa yeZimbabwe ikuzizalwane zaleli lizwe kodwa waphanga wathembisa ukuba uhulumende wakhe uzimisele ukuphathisana kuntuthuko laleli lizwe kwelakusasa.
Kunxoxo yakhe labahleli bezindaba ngesikhathi sokudla kwemini eHarare ngoLwesibili, umnumzana Wharton uthi ilizwe lakhe liphathisa eleZimbabwe kunhlangothi ezibalisa ezempilakahle, ezokulima lezinye ezinengi nengi. UWharton uveze njalo ukuba uhulumende welizwe lakhe uzinikele ukuphathisa ekuthini eleZimbabwe lithuthuke lalo kwezomnotho.
Lanxa bekhona ababekelwa izijeziso zomnotho okubalisa amankampani kanye lamanye amalunga aphatheke kwezombusazwe, uthi eleMelika lizimisele ukuhlolisisa lezi zijeziso kusiya ngokuthi kuyini osekusenziwa nguhulumende kamongameli Robert Mugabe ukulungisisa okwabangela ukubekwa kwalezo zijeziso. Uthi eleMelika belilokhe lisehlisa inani lalabo ababekelwa izijeziso phakathi kweminyaka edluleyo njalo bazimisele njengohulumende ukuhlolisisa ukuba sisesekhona na isizatho sokuba zibe lokhe zibekiwe lezi zijeziso.
U Wharton uveze njalo ukuba lanxa ekhona amanyathelo asethathwa ukulungisisa ubudlelwano phakathi kwamazwe womabili, kunengi okusamele kwenziwe njalo abesigodlo sakhe bakubone kufanele ukuba umkhokheli weZimbabwe umongameli Robert Mugabe,angaze anxunswa emhlanganweni ozakwenziwa ngumongameli Barrack Obama lenkokheli zamazwe awezwekazi le Africa ekupheleni kwayonale inyanga owe US/AFRICA SUMMIT.
Utshele abahleli bezindaba laba uWharton ukuba akaboni lelinyathelo lingenza ezinye inkokheli ezisemazwe awezwekazi leAfrica, bekhalala ukuza kulomhlangano ngoba enganxunswanga uMugabe kiwo lanxa ethi zisesekhona ezinye zalezinkokheli elokhe zingakacaci ukuba zizakuza kulumhlangano loba hatshi.
Esekhuluma phezu kwamabandla awezombusazwe alokhe elwisana wodwa uWharton uthie akacaci lamabandla ukuba kuyini azakwenzela uzulu ukuze ahlale ngokuthula elizweni. Uthi lohlelo lwebandla elibusayo le Zanu PF lwe Zimbabwe Agenda for Socio Economic Transformation lungacaci kakuhle ukuba luhloseni.
Udaba lokudonselana okusebandleni eliphikisayo le reMovement for Democratic Change, elikhokhelwa ngumnumzana Morgan Tsvangirayi, uWharton uthi kabasekeli cele njengoba bekhulumisana lawo omabili.
Umkhokheli we MDC umnumzana Morgan Tsvangirai uhluphana lolunye uhlangothi lwalelibandla olukhokhelwa ngobengunobhala jikelele walo umnumzana Tendai Biti.