NgoLwesihlanu izitalada zakoBulawayo bezitshaya umoya kungela muntu ohambayo kukanti lemalokitshini uzulu ubezivalele ezindlini esesaba ukuhambela phandle.
Abezomvikela yibo bodwa abakade bebonakala besemigwaqweni bevimba wonke odlulayo laloba ulencwadi evumela ukuhamba. Amabhizimusi amanengi abevaliwe, lokuthengiselana bekwehlile kakhulu kuleli dolobho.
Umnumnza Kelvin Maphosa oyisakhamuzi sakoBulawayo uthi wesabe ukuwelwa yingozi kungakho ehlezi endlini.
“I Demo ibi right ukuthi yenzakale ngoba yiyo indlela eyodwa esingayikwanisa njengabahlali beZimbabwe sitshengisele ukuhlupheka kwethu, sithumele umlayezo kubaphathi belizwe ukuthi lapha esihlala khona ama conditions awakho right. Mina okungenze ngahlala endlini yikuthi ngesaba ukuhlukulezwa ngamapholisa lama sotsha lapha emgwaqeni ngoba sungatshaywa ufe.”
Umnunzana Makheli Thamsanqa Ndiweni umkhokheli weMahlabezulu Movement lamaNdebele ka Mzilikazi Pressure Group uthi abantu bengavumi ukusetshenziswa.
“Ama Demo la kawangasebenzisi abantu bakithi. Sibonile ngo November 2017, abantu bakithi besetshenziswa. Owa announcer i coup ngumuntu weMthwakazi, owaxotsha umuntu lomabisa abantu ngoweMthakazi. So i Demo kakube yikuthi abantu sebebonile ukuthi kubi hatshi ukuthi si sanitizer i ZANU PF.”
Unkosikazi Linda Ndebele isakhamuzi sakoBulawayo uthi uhulumende wenelisile ukwethusela uzulu ukuba angayitshengisela.
“Uhlupho olukhona lapha eZimbabwe yikuthi singabantu abalokwesaba kakhulu. Endaweni yokuthi lamuhlanje sihambe siyetshengisela ukuthi sesithwele nzima ngohulumende lo okhona kodwa sesabile satshona sihlezi endlini kwaba yi Stay away ngoba uhulumende bekunjongo yakhe ukuba asenze sehluleke ukutshengisela ukuba sesikhathele ngaye. Okwalamuhlanje ngibona engani i Demo kayiphumelelanga kodwa injongo kahulumende ukuthi ancindezele i Demo leyi ibe yi Stay away ifezekile.”
Umnunzana Effort Ncube unobhala wenhlanganiso yamalungelo abathengi eyeNational Consumers Rights Association i(NACORA) uthi abantu kabangakhali ngenzuzo abangabe belahlekelwe yiyo ngoba amabhizimusi evalile kodwa balwise inkohlakalo eyenziwa nguhulumende.
“Ukungavulwa kwezitolo lamabhizimusi athile kanye labazisebenzayo, kuyikulahlekelwa kakhulu yilabo abakade bezazuza. Kodwa ke ukulahlekelwa okukhulu elizweni kayisikho lokhu, yi corruption inkohlakalo ekhona efane ilwise. Abantu balahlekelwa zimali ezinkulu ezitshontshwa nguhulumende kanye lezisebenzi zakhe. I corruption yiyo e coster ilizwe kakhulu okwedlula imali angabe ilahlekile lamuhlanje.”
Kuleyinye ingxenye kazulu ebona ukutshengisela kungayisiyo indlela yokulungisa umumo welizwe. Omunye wabo yisakhamuzi seNkulumane umnumnzana Donald Gabaza othi kufanele inkokheli zamabandla ehlukeneyo zihlangane ndawonye zilungisise uhlupho olukhona elizweni.
“Mina ngibona engazathi indaba yama Demo ikakhulu ngalesi isikhathi esikuso angiboni kuyinto engasincedisa ukuthi sixazulule inking ezikhona ezomnotho. Ngibona engazathi abakhokheli bethu bama political parties kumele bahlangane bexoxisane ukuze kubonakale indlela esingaqhubeka ngayo phambili sixazulule inking ezikhona. Khathesi kunje ngesikhathi se Corona ama cases ayala eqansa, ama health systems ethu awaqinanga kangako ukuthi angamelana lama cases amakhulu angavela kumaDemo ngoba abantu bayabe beminyene.”
Ingcwethi ezicubungula ezomnotho zithi amabhizimusi alahlekelwe yibhizimusi ekuqaleni kwayonale iviki, njalo kungadonsa kuze kufike kwezayo ngoba abathengi beyehluleke ukufinyelela kibo. Bathi njalo labo abathengisa ngokungekho emthethweni bahlaselwe kakhulu ngoba lokhe kwaqala umkhuhlane we Corona sekulemigoqo eminengi ebavimba ukuthengisa kuhle. Kodwa amanye amabhizimuzi abikwa eyitholile inzuzo liviki yonale ngoba uzulu ubethenga okwedlulisileyo esesabela ukuba kuzaba lokuvalwa kwedolobho ngempelaviki leyi.
Unobhala kugatsha lukahulumende lwezokukhitshwa kwemibiko, umnumzana Nick Mangwana ulobe enkundleni yokuxhumana eyebulenjini eyeTwitter esithi ukutshengisela obekuqoqwe namhlanje akuphumelelanga ngoba endaweni ezehlukeneyo zelizwe bekulokuthula. Uthe njalo kwezinye indawo bekubonakala amapholisa angahlomanga ebhodabhoda elondoloz ukuthula kodwa izitolo ezimbalwa zivalile.
