Ekhuluma emngcwabeni kaMnu. Aguy Georgias, eNational Heroes Acre, umongameli Robert Mugabe usole indlela abamabhanga abasebenza ngayo, ebeka loluhlangothi umlandu wokuqilibezela uzulu, wengeza ethi ulethemba lokuba ukusungulwa kokusetshenziswa kwemali yakweleChina kuleli kuzaphathisa ukululungisisa loluhlangothi, lwehlukane lemikhuba yalo emibi le.
Bekulama choir ambalwa abekade bekulumngcwabo ukuzacula ingoma zokholo, okugoqela i-Budiriro Roman Catholic Choir.
Umuyi, uGeorgious, obengomunye wamalunga edale leSenate engowebandla leZanu Pf, obhubhe ngolweSihlanu olwedluleyo ngemva kokugula okwesikhathi eside, uchazwe ngabemhuli yakhe njengendoda uqobo njalo ebithanda ukusebenzela intuthuko, hatshi eyemuli yakhe kuphela kodwa lesizwe sonke.
Emazwini akhe awethule kulomngcwabo lamuhla lapho kulaliswa khona abaphiwa inhloniph yeqhawe lesizwe, umongameli Mugabe uchaze umuyi njengomuntu owayekhuluma inqondo yakhe, engancengi muntu njalo elesibindi sokwenza ayabe ekuhlosile.
Wathi uMugabe, umuyi kube nguye obelwisana labelungu, ebasa emadale emthethwandaba yaphezulu, kudaba lokubekelwa kwelizwe isijeziso zomnotho, okwabangela ukuphazamiseka kokuqhutshwa komsebenzi lakunkampani yakhe ye Trinity Engineering.
Ukhulume ethukuthele umongameli Mugabe lapho ephatha udaba lwamabhanga, ebeka loluhlangothi umlandu wokuba ngamaqili ngoba beqilibezela uzulu owasebenzisayo, behlawulisa imithelo edlulisa amalawulo.
Njengenhlalayenza, kabazihluphanga abamabandla aphikisayo elizweni, ukuya kulomngcwabo, bethi ngoba limikhosi seyathathwa yenziwa eyeZanu PF.
Umnumzana Pattison Murimoga, olilunga le Bikita West Constituency esigabeni se Masvingo, uthi unina labanye abanje ngaye, baphatheka labo kulempi yenkululeko ngendlela ezehlukeneyo, kodwa edaniswa yindlela udaba lokungcwatshwa kabalwa limpi lwenziwa ngayo.
Umuyi umnumzana Aguy Georgious obhubhe ngolweSihlanu, eseleminyaka engamatshumi ayisitshiyagalombili ( 80 ) yokuzalwa, ubikwa etshiye unkosikazi labantwana abalitshumi lanye.