Umkhokheli welinye lamacele e-MDC uMnu. Morgan Tsvangirai ngoLwesithathu ubhoda-bhode edolobheni lakoBulawayo ehlola inhlelo eziqhutshwa yikhansili yalelidolobho, lapho agcizelele khona ukuthi kuyadanisa ukuthi amankampani alokhu evalwa labantu belahlekelwa yimisebenzi.
UMnu. Tsvangirai uhlolisise inhlelo zamanzi, imigwaqo, kanye leze zindlu ngemva kokwamukelwa ngamakhansila angamatshumi amabili lanye kulelidolobho.
Ukhangelelwe ukuhlangana lamalunga ebandla lakhe ngoLwesine langoLwesihlanu kulelidobho, abesegqiba uhambo lwakhe ngomkhosi wokunanza ilanga lamalungelo abesifazana ewolu ye Stanley Square.
Umqoqi wenhlelo zalelibandla uMnu. Abednico Bhebhe utshele uSithandekile Mhlanga weStudio 7 ukuthi kube lokuphithizela okukhulu ezitaladini zalelidolobho abantu bethabela uTsvangirai okubangele ukuthi ehluleke ukukhulumisana labathengisa impahla ezitshiyeneyo njengoba abanye bebengalimala.
