Ibandla leMovement for Democratic Change elikhokhelwa nguNkosazana Thokozani Khupe, eleCoalition of Democrats lele People’s Democratic Party athi sokumele kwenziwe inkulumo zamabandla zokulungisa umnotho welizwe kanye lezombusazwe eZimbabwe.
Amabandla la ethule lokhu ngoLwesithathu eHarare lapho aqhube khona umhlangawo wokuhlenga ilizwe leZimbabwe elilomnotho osuguqa ngamadolo.
Omunye wabakhulume lenthathelizindaba emhlanganweni lo nguNkosazana Khupe othe ukukhulumisana yikho kodwa okuzaguqula umnotho welizwe leZimbabwe.
“Esikukhalelayo lapha njengama political parties yikuthi kube lenkulumo ezabuyisa ama Zimbabwe wonke ndawonye kuvela kuma church, ama civic society organisations, ama political parties, ama women’s organisations ama youth, uhulumende sithi gwaqa endlini eyodwa sikhulume ukuthi kuyini esingakwenza ukuthi ilizwe lethu liqubekele phambili.”
Amabandla la asole kakhulu udlakela osolusenza engani ilizwe lihlala likusikhathi sokhetho nsuko zonke.
Uhulumende kaMongameli Emmerson Mnangagwa useveze laye ukuba sokungadingakala ukuba abantu bakhulumisane kudaba lokwakha isizwe.
Amabandla la athi akakhethi okumele aze emhlanganweni lowo okugoqela okhokhela elinye icele leMDC, uMnu. Nelson Chamisa.
