UNkosazana Thokozani Khupe, omiswe okwesikhatshana ukudlelana lebandla leMDC-T, uthi umkhokheli webandlal leli, uMnu. Douglas Mwonzora, nguye osezixhotshe kubandla leli ngoba uhambise incwadi eZimbabwe Electoral Commission wabatshela ukuthi ungumkhokheli webandla leMDC Alliance.
UMnu. Nqobani Sithole, igqwetha lika MaKhupe, lithi uMwonzora wenza ubutshapha obumangalisayo ngokulobela iZEC incwadi esithi nguye okhokhela ibandla leMDC Alliance, ekhokhelwa nguMnu. Nelson Chamisa.
USithole uthi kulokuthi uMwonzora athi usexotshe uMaKhupe, nguye osesuswe esikhundleni somkhokheli webandla leMDC-T.
USithole uthi uMaKhupe ulandela isisekelo sombuso webandla leli ngoba bonke abantu abathi basekela iMDC Alliance ababekudale lephalamende lamakhansili baxotshiswa kulezondawo libandla leli.
“Ngakho-ke uMaKhupe uthi okwehlela abantu bonke laba kumele kwehlele njalo uMwonzora. Lokhu akwethule encwadini ayilobele uMaKhupe yikuzikhulumela nje. UMwonzora wazisuswa kubandla leli ngokuvezela iZEC ukuthi nguye umkhokheli webandla leMDC Alliance. Kutsho ukuba incwadi ayilobele uMaKhupe kayilamkantsho ngoba kasekho kubandla leli.”
UMwonzora kavezanga izizatho zokumisa owesikhatshana uMaKhuphe ukuba lilunga leMDC_T.
Uthe kunengi okwenze ukuba bamise ukubalilunga lebandla leli. Kazange aphumele egcekeni ngalokhu ngesikhathi ibandla leli lilungiselela ukhethi lwenkokheli emhlanganweni omkhulu oweCongress ozakwenziwa lonyaka.