Omele iPalestine kwele Zimbabwe, uMnu. Tamer Almassri, uthi badane kakhulu ngokuswela usekelo olugcweleyo kudaba lokuhlaselwa kwabantu eGaza Strip libutho lakwele Israel eselibulele abantu abafika phose inkulungwane ezintathu lengxenye – 3,400 selokhu kuqhamuke impi phakathi kwele Israel leHamas. U-Almassri uchothoza njalo okwenziwa ngele Melika eGaza Strip.
UAlmassri wethule umbiko lo namuhla eHarare ngesikhathi ekhuluma lentathelizindaba.
“ElePalestine kaliyikubuyela emuva lizokulwa ngoba singeke savumela ele-Israel ukuvuselela indlela zobuncindezeli.”
Bekulenhlanganiso ezitshiyeneyo ebezilezithunywa ezilalele umbiko kaAlmassri ebezizoveza ukusekela iPalestine ebhonjwa nsukuzonke ngele Israel elithi lidinga iHamas ngamehlo abomvu. UMnu. Martin Zharare obemele inhlanganiso yeCitizens Against Economic Sanctions uthi abantu ePalesine kumele bethole uzibuse ogcweleyo.
“Lathi siyakhala lamaPalestina, amaPalestina bathi bafuna ilizwe labo njalo bafuna ukuthi thina njengaZimbabweans sikhale labo sithi iPalestine ifanele ukuthi ibe lelizwe layo.”
Kuhambo lwakhe lokwethekelela kwele Israel, uMongameli Joe Biden wakwele Melika uveze ukuba ilizwe lakhe lizaqhubekela phambili liphathisa eleIsrael lize linqobe.
“Sizoqhubeka sibasiza ukuze sisindise impilo zezizalwane zabe-Israel.”
UBiden uthethe lelithuba lohambo lwakhe ukuyahlangana lomkhokheli wakwele Israel uMnu. Benjamin Netanyahu, othi iHamas yiyo eyabhomba esibhedlela esikhulu eGaza Strip yabulala abantu abafika amakhulu amahlanu – 500. IHamas iyakuphika lokhu isithi kwenziwa libutho lakwele Israel. Abanye bacabangela ukuba ibhomba eyabulala abantu yaphoselwa yiPalestinian Islamic Jihad. Labo bayakuphika lokhu. UNkosikazi Ofra Fahri ophethe isigodlo sakwele Israel kwele Zimbabwe uthi kuyamangalisa okukhulunywe nguAlmassri.
“Kungumsebenzi lesibopho kanye lelungelo likahulumende lokuvikela izizalwane zakhe. Ngicabanga ukuthi wonke umuntu angeke athande ukuzihlanganisa labantu abalolunya olunje, ungathanda ukuzihlanganisa lobuntu.”
Isikhulumeli sesigodlo seMelika sithi eleIsrael lilwisana leHamas hatshi abantu abahlala ePalastine.
“EleUnited States liyayisola leyo misebenzi yobugebengu njalo lithi lizoqhubekela phambili ukulondoloza abantukazana.”
Ingcwethi ecububungula ubudlelwano bamazwe womhlaba, uMnumzana Teddy Ncube ongumcebisi kunhlanganiso yeLeaders for Africa Network uthi okwenzakalayo kutshengisa ukwehluleka kwabamazwe omhlaba ikakhulu athuthukileyo ukuxazulula isisusa sale impi ngoba ukufuthelana phakathi kwamazwe womabili sokuleminyaka eminengi. Uthi udaba lolu lwaziwa njalo yinhlanganiso yamazwe omhlaba wonke eye-United Nations lezinye.
“Ngokunjalo ke i-conflict yona leyana, bekuzafika ku-stage sonesi nje esesifike kiso sonesi kodwa yinto eyethusayo yinto kade kungamelanga yenzakale ngoba ama-channels eDiplomacy abekhona obekungekho yi-political will ikakhulukazi kwamanye amazwe ukuthi bancedise bona labo esingathi ngama-victims. I-political will yona leyo ukungabi khona kwayo yikho osekulethe loluhlupho esesilalo.”
IHamas yangena kwele Israel ngamandla amakhulu lapho ayabulala abantu abafika phose inkulungwane lengxenye – 1,400 njalo yathumba abafika amakhulu amabili – 199, abagoqela labadabuka kwamanye amazwe. Ibutho lakwele Israel lithi lizangena ngenkani eGaza Strip liyebulala bonke abadlelana leHamas. Kodwa abantu emazweni atshiyeneyo sebetshengisela emigwaqweni besola okwenziwa ngele Israel loba bechothoza njalo indlela iHamas eyabulala ngayo abantu kulelolizwe. Kusenjalo, eleMelike selithumele ibutho elihlome laphelela eliselwandle okwamanje lapho elimelele ukunikwa imvumo nguBiden ukuba limanyane lele Israel lihlasele iHamas.
Forum