Abaphila lejwabu elilombala ongaphelelanga elihlaselwa lilanga (albinism) benze umhlangano eHarare wokunanza okwenziwayo emhlabeni jikelele ukwehlisa inhlupho ababhekane lazo ele International Albinism Awareness Day.
Bakhuthazane ukuthi akumelanga balahle ithemba lokulwisana lamalungelo abo.
Umhlangano lo ubuqoqwe yinhlanganiso ye-Alive Albinism Initiative imanyene lezinye inhlanganiso zabaphila lobugoga.
UNkosazana Samantha Sibanda wenhlanganiso ye-Signs of Hope Trust uthe udubo olukhona lubandlululo oluvezwa ngabantu abanengi luqondiswe kubo.
Uqhubeke esithi abantu abanje kumele bebizwe ngegama elithi ngabantu abalobala kulokubabiza ngokuthi zinkawu.
Inhlanganiso ye Alive Albinism ithi ilemikhankaso yokufundisa uzulu nge-albinism okugoqela ezikolo, ezinkonzweni, lakundawana ezitshiyeneyo.
Ngokunjalo sebelommeli wokufundisa nge-albinism uBrand Ambassador wabo ongumculi, uSandra Chirenje, ojabulise abantu ngomculo wakhe.
Uthe uhambela izikolo esenza imidlalo yokulungisa eyama drama lomculo ekhuthaza abantu ukuzwisisa nge-albinism noma ebhekana lenkinga lapha lalaphaya.
UNkosazana Sibanda uphinde wathi babone kufanele ukumanyanisa lumbuthano lezinye inhlanganiso ezifana leyabo njengosekelo ukuze ilizwe lenkuthazo yabo kwamukelwe kancono.
Abantu abangene lumbuthano onanzwa minyaka yonke phansi komanyano wamazwe omhlaba bakhala ngobandlululo lokukhangelelwa phansi nguzulu okuqhubekela phambili kanye lokubandlululwa lase msebenzini.
Abenhlanganiso ezitshiyeneyo ezimela abaphila le-albinism bathi babone kuqakathekile ukuthi baqhubekele phambili belwela amalungelo abo betshengisa ithemba noma inguquko loba kungakhanyi kangako ingqubekela phambili ekunanzeni amalungelo abo.
Uthi kumele basebenze ndawonye labanye abalwela ilungelo loluntu ukwenzela ukuthi bangakhahlanyezwa nguzulu.
